Svein-Rune har logga 1111 treningskilometer hittil i år

Klokka er 0515. Det er så vidt det er plussgrader i Ålesund. Dei fleste ligg godt og varmt under ei dyne. På langt nær klare til å starte ei ny veke.

Svein-Rune Johannessen tar på seg treningskle, trykker på play på treningsappen og spring ut i den kalde aprilmorgonen.

Les:

• Slik kan treningsappen hjelpe deg å kome i bikiniform
• Test av treningsapper på mobil

Gir motivasjon

I over eit år har kyrkjeverje, bytyrepolitikar og familiefar Svein-Rune Johannessen i Ålesund stått opp grytidleg for å springe nesten kvar dag. Den faste treningsrunden er rundt 16 kilometer.

– Eg trenar før jobb fordi då går det ikkje utover tida med familien. Eg spring runda, dusjar, lagar frukost og matpakkar før dei står opp, fortel han.

Men han vedgår at det er lite selskap i han utover dei små timar.

– Eg legg meg rundt 22 kvardagar, og så sit eg ofte og søv i ein stol rundt klokka 23 i helgane.

Det er to år sidan han starta å logge treninga si med treningsappar på mobilen.

– Eg kan samanlikne med meg sjølv og sjå utviklinga over tid. Det gir motivasjon, seier han.

Postar på Facebook

Trening i sosiale medium er elska og hata. Å følge med på andre sine treningsøkter via appar eller oppdateringar på Facebook kan både inspirere og irritere.

Svein-Rune Johannessen postar av og til treningsøkta på Facebook. Så rundt dei tider mange av hans Facebook-vener står opp, ligg der klar ei oppdatering frå Johannesen om at han har sprunge minst 16 kilometer.

– Trur du andre kan bli misunnelege på deg fordi du er så sprek?

– Eg får ikkje så mange tilbakemeldingar. Men dei eg får er positive. Dessutan ser eg ikkje på meg sjølv som så veldig sprek. Det er vel ikkje noko gale i å halde seg i form, det er heller gale å ikkje halde seg i form, seier han.

• Les: Treningsproffene

Gir meir

Svein-Rune Johannessen meiner at det gir han meir å trene med treningsappen enn utan. Men når han spring maraton i utlandet, blir det for dyrt å logge.

– Så i tillegg til dei kilometera eg har logga, har eg sprunge to maraton og nokre treningsrundar i utlandet. Det vil seie rundt 33 mil i tillegg, seier han.

Han meiner treningsappen gir meir enn motivasjon til å yte meir på trening.

– Når eg reiser rundt i landet på kurs og møter er det veldig kjekt å bruke appen til å finne nye rundar å gå og springe, seier Johannessen, før han spring heim for å dusje og gå på jobb.