Brotet på hovudkraftlinja mellom Sunndal og Ørskog førte til at 120 000 sunnmøringar var utan straum to gongar i morgontimane.
120 000 utan straum
Kraftselskapa Tussa og Tafjord har no sørga for nok eigenproduksjon av kraft til å forsyne abonnentane på Sunnmøre
Statnett veit enno ikkje kor alvorleg brotet er. Dersom det tar lang tid å fikse linja, kan det bli snakk om rasjonering på Sunnmøre.
Beredskapssjefen for kraftforsyninga i Møre og Romsdal, Svein Rødal, er svært spent på resultatet av Statnett sine undersøkingar.
Låg fylling i magasina
Vassmagasina på Sunnmøre er allereie svært slunkne. Dersom situasjonen blir langvarig, kan det bli snakk om rasjonering utover våren.
– Vi er på eit kritisk nivå alt no. Dersom situasjonen blir langvarig, vil det kunne skape problem for Sunnmøre. Kanskje for Møre og Romsdal også.
- Kva problem snakkar du om då?
– Det er vanskeleg å spekulere når vi veit så lite, seier han.
– Men dersom vi skal verste fall, så kan dette auke faren for straumrasjonering i løpet av våren. Dersom vi ikkje har vatn til å produsere kraft og hovudleidningen frå nord er ute, så er det ikkje nok kraft til å forsyne Sunnmøre med reserveleidningen vi no har kobla inn.
Ventar på Ørskog Fardal
Svein Rødal seier Sunnmøre ikkje hadde mista straumen i ein liknande situasjon dersom den planlagde kraftlinja mellom Sogn og Sunnmøre hadde vore på plass.
– Feilen på linja mellom Sunndalsøra og Ørskog hadde ikkje ført til straumbrot på Sunnmøre om den nye linja var på plass. Ørskog har berre mating nordfrå i dag, men med den nye linja vil matinga bli dobla, seier Rødal til NRK.