Brann starta i bubil – Raumabanen og E136 var stengde i fleire timar

Eit bustadhus brann ned til grunnen i Rauma i Møre og Romsdal i natt. Huset ligg like ved den sterkt trafikkerte europavegen gjennom Romsdalen.

Brann på Trøan i Rauma.

OVERTENT: Brannen starta i ein bubil. Bubilen sto heilt inntil eit hus, og brannen spreidde seg raskt.

Foto: POLITIET

Raumabanen og Europavegen er no opna etter å ha vore stengde i fleire timar.

Naudetatane fekk melding like før klokka 02.00 om brann i ein bubil som sto like inntil ein einebustad. Bubilen var overtent og brannen var i ferd med å spreie seg

Det var ein bilist på E136 som stoppa for å ringe naudetatane då han såg brannen. Medan han var i telefon med 110-sentralen spreidde brannen seg over til huset.

Det var ein bebuar i huset når brannen starta. Vedkomande kom seg ut og er sendt til legevakt for sjekk.

Brann ved Trøan i Rauma.

FULL FYR: Det var ikkje mogleg å berge huset.

Foto: BRANNVESENET I RAUMA

Eigedomen ligg ved Trøan, like aust for Kors kirke i Romsdalen.

– Huset ligg tett inntil europavegen, så den vart stengd. I tillegg måtte brannvesenet pumpe vatn frå elva. Det førte til at vi måtte stengje Raumabanen for å trekkje slangar over jernbana, seier operasjonsleiar Møre og Romsdal politidistrikt, Tor André Gram Franck.

Omfanget av brannen gjorde at Brannvesenet i Rauma måtte kalle inn mannskap med tankbilar frå nabokommunane Lesja og Molde.

Brann ved Trøan i Rauma

LIKE VED EUROPAVEG: Huset som brann ligg like ved E136 i Romsdalen.

Foto: BRANNVESENET I RAUMA

ROMSDALEN: Brannstaden ligg ved Trøan, like aust for Kors kirke.