Det var i 14.30-tida laurdag at politiet fekk melding om ein brann i eit fjøs på Romundstadbygda i Rindal. Alle naudetatane rykka raskt ut til staden.
Fleire dyr brann inne
Det skal ha vore kyr, hestar og nokre høner inne i fjøset då det byrja å brenne.
– Ifølgje eigarane har tre kviger og to hestar omkome i brannen. Om lag 50 dyr er ute av fjøset og ser ut til å vere uskadd, melde politiet i 15.40-tida laurdag.
Ein veterinær blei tilkalla for å undersøke dei evakuerte dyra og klokka 17.00 kunne politiet fortelje at mellom anna ein kalv måtte avlivast.
Kjelder på staden fortel til NRK at det kan vere snakk om å avlive fleire dyr.
Ukjent brannårsak
Klokka 17.00 opplyser politiet at brannen er sløkt og at brannvesenet held på med ettersløkking.
Brannvesenet frå Rindal og Surnadal fekk støtte frå brannvesenet i Meldal i Trøndelag, og dei jobbar no for å sløkke brannen.
Det er så langt uklart kva som var årsaka til brannen. Saka vil bli etterforska.
Ingen personskadar
Operasjonsleiaren fortel vidare at det ikkje skal vere snakk om personskadar i samband med brannen.
– Etter det vi veit er det ingen personar som har fått skadar, seier Leif E. Bergem-Ohr, operasjonsleiar i politiet på Nordmøre og i Romsdal til NRK.