– Eg veit ikkje kva eg skal sei for å verte høyrd. Eg veit nesten ikkje om eg skal le eller grine. Det tek ekstremt mykje krefter å måtte stå her og protestere for denne saka, seier Janne Moe.
Dei andre demonstrerande bøndene utanfor rådhuset i Ørsta jublar og klappar.
Inne i kommunestyresalen skal eit knapt fleirtal til å vedta at dei vil byggje hustomter på dyrkbar mark og leggje ein veg tvers gjennom gardstuna.
Elias Moe, far til Janne, seier ei nedbygging av matjorda vil bety kroken på døra for dyrehald på garden hans.
Vil prioritere bustadar
Etter planen skal det med tida brukast kring 200 dekar dyrka og dyrkbar jord i samband med det nye bustadfeltet på Fremre Mo.
Sjølv om det ikkje er so mykje, trur bonde Ingrid Solhjem at det blir lettare å ta meir i framtida, sidan det då berre står att nokre bitar med dyrkamark.
– Klart, vi er fire bønder, men det er slik at om ein tek mange små, vert det stort til slutt, seier Solhjem.
Bøndene tykkjer utbyggingsplanane er eit paradoks når styresmaktene ber kommunane om å ta vare på dyrka mark.
Berre 3 prosent av Noregs landareal er i dag dyrka mark. Det tek hundreår eller tusenår å danne ny matjord. Regjeringa har skjerpa inn tiltaka for å sikre at jorda ikkje blir nedbygt.
Eit knapt fleirtal i kommunestyret i Ørsta vedtok torsdag første steg i utbygginga av området.
Høgre sin ordførarkandidat, Per-Are Sørheim, meiner det må til for folketalsutvikling og tilflytting.
– Vi er ganske bekymra for at vi ikkje kan tilby tomter. Det er viktig i den satsinga vi har med sterk utviding av sentrum og bygg av ny vidaregåande skule, seier Sørheim.
Han forstår at bøndene er frustrerte, men meiner at når dei driv gard i sentrum må dei forvente at området må utvikle seg.
Han meiner det er få andre område som eignar seg på grunn av fare for skred og flaum.
Punktum er ikkje sett
Moe meiner alle planane om utbygginga på Fremre Moe burde skrinleggjast til evig tid – for å sikre matjorda som er i bruk i dag og den som kan takast i bruk ved behov.
– Folk her frampå Mo er veldig sta, so vi gjer aldri opp.
Kommunestyret i Ørsta vedtok ei planendring kring vegen. Difor må vedtaket om bustadtomtene ut på ny høyring og på nytt opp til diskusjon hjå politikarane.
No skal Moe kontakte advokat for å kjempe vidare.
– Om ein tapar eit slag, so har ein ikkje naudsyntvis tapt heile krigen.