Byturen fredag var sponsa av fiskerinæringa i området, og dermed kunne Julie Jønland Osen (15) og Thea Honningsvåg (15) bruke dagen i Ålesund, etter å ha vore på seminar. Initiativtakarane vil gjerne rekruttere nye jenter og gutar til fiskeri- og havbruk, men jentene let seg ikkje lokke.
– Nei, det er utanfor mi komfortsone. Eg vil ikkje tilverke fisken, det er ikkje noko for meg, seier Osen bestemt.
Ho har lenge drøymt om å bli politietterforskar, og den draumen aktar ho å forfølgje. Venninna Thea Honningsvåg kjem frå ein familie der alle jobbar i fiskerinæringa, men seier ho sjølv helst vil bli advokat.
Håper å få tak i dei beste
Likevel er det nettopp desse jentene og nesten 1000 andre ungdommar fiskerinæringa vende seg til i Ålesund fredag. Alle blei påspandert bytur, for å høyre næringa reklamere for seg sjølv. Dei lokkar med gode lønsvilkår, mykje fritid og ein spennande jobb.
– Dette gjer vi for å få ut informasjon om sjømatnæringa og i dag hovudsakleg fiskeflåten. Vi ønskjer sjølvsagt også å rekruttere dei beste av dei beste, seier Anita Farstad ved Marint Kompetansesenter.
Bestemte seg då han var 5 år
Mats Grimstad frå Valderøy i Giske har ein far i næringa, og fekk smaken allereie då han var ein gutunge. Han starta som fiskar, og er i ein alder av 25 år skipper i Nordnes-reiarlaget.
– Eg var berre fem år då eg bestemte meg for å bli skipper. Eg har vanka om bord i desse båtane, og det var aldri nokon tvil for min del, seier han.
Held fast på planane sine
Så enkelt er det ikkje for Honningsvåg og Osen. Dei følgde fredag formiddag foredraget om framtida innanfor fiskerinæringa, men seier det ikkje endra noko for deira del.
– Eg trur eg har vore ganske bestemt sidan eg var lita at eg ikkje ville arbeide med fisk, men eg veit jo ikkje kva som skjer når eg blir eldre, så det kan jo godt hende, seier Honningsvåg.
– Kva skal til for å endre planane dine om å bli advokat?
– Kanskje dersom folk hadde snakka endå meir med meg, og fått meg med på fisking, kanskje eg hadde endra meg då, seier ho.