I ein epost til redaksjonane i Møre og Romsdal skriv bispedømmet kort at "Valadministrasjonen i Møre bispedømme tek kyrkjerådets svar til vitande og offentleggjer straks det totale valresultatet".
Romsdals Budstikke har tysdag ettermiddag forsøkt å få kommentar frå bispedømet, men utan å lukkast.
Avisa har derimot fått tak i leiaren for Open folkekyrkje, Therese Utgård, som klaga på hemmeleghaldet og ho er glad for resultatet.
– Vi er glade, men ikkje overraska, seier ho, og seier ho reagerer på at saksbehandlinga har tatt fire veker.
Les også:
- Ikkje relevant
Kyrkjerådet har konkludert med at bispedømmet sin måte å bruke heimlar i Valordninga, Forvaltningslova og Offentleglova, som viser til tausheitsplikt, konkuranseomsyn og forskjellsbehandling, ikkje er relevante i saka, skriv avisa.
Dermed må bispedømmet offentleggjere resultata.
Open folkekyrkje vil bruke tala til å drive valkamp for kandidatar som ligg ekstra godt an, og til å kontrollere valet, slik det er gjort i andre bispedømme.
Avvist to gongar lokalt
Bakgrunnen for klagen var at Open folkekyrkje ønskte ein oversikt over resultatet frå første valomgang, framfor den nye runden i kyrkjevalet. Men administrasjonen i Møre bispedømme avslo ifølgje avisa innsyn i personrøyster for alle kandidatane, oversikt over slengjarar og opplysningar for dei kandidatane som ikkje blei direkte innvald i første runde.
Kravet skal ha blitt avvist to gongar av administrasjonen lokalt, før klagen gjekk til Kyrkjerådet nasjonalt.