Hopp til innhold

– Eg blei ganske skjelven etterpå

Under køyreturen byrja det plutseleg å ryke frå bilen og like etter stod han i full fyr.

Bilbrann i Kristiansund

Dieselbilen tok plutseleg fyr då kvinna var på biltur.

Foto: Anne-Mari Flatset / NRK

Naudetatane fekk melding om bilbrannen i Nordmørsveien i Kristiansund klokka 09.47 onsdag. Den kvinnelege sjåføren merka at bilen miste motorkrafta og det byrja å kome kraftig røyk ut. Plutseleg var bilen i full fyr.

– Eg blei ganske skjelven etterpå, seier kvinna til NRK. Ho ønskjer ikkje å stå fram med namn, men fortel at ho under køyreturen ikkje merka noko unormalt på dieselbilen.

Ho kom seg raskt ut av bilen og i trygg avstand frå dei intense flammane. Der blei ho ståande og sjå at bilen brann som eit bål midt på vegen medan brannvesenet dreiv sløkking.

Bilbrann i Kristiansund

Brannvesenet fekk raskt sløkt bilbrannen.

Foto: Anne-Mari Flatset / NRK

Brannvesenet seier at både nye og gamle bilar kan ta fyr.

– Det blir sjølvsagt svært mykje røyk. Det er mange stoff i bilen som skaper mykje røyk når det brenn, seier vaktleiar ved 110-sentralen, Kjetil Iversen.

Hans beste råd dersom du oppdagar at det byrjar å ryke frå bilen, er å svinge bilen til sides og stoppe. Bruk naudblink, kom deg ut av bilen og varsle naudetatane.

– Røyken kan vere svært giftig, så den må folk halde seg unna, seier Iversen.