No kan du besøke mirakelhuset i Ålesund

23. januar 1904 stod heile Ålesund i brann. Waldehuset låg midt i eit stort område med trehus, men var det einaste som kom uskadd frå flammane.

Dagen før bybrannen fekk leigebuar Anders Nord eit syn. Ein lysande engel skal ha sagt at at byen skulle leggast i oske, men at han og kona skulle halde seg i ro innandørs og ikkje bere med seg eigedelar ut. Natta etter braut det ut brann som spreidde seg i alle retningar fordi det bles orkan. Nord nekta å forlate huset, som vart ståande uskadd. Sidan den tid har det vorte kalla mirakelhuset.

I dårleg stand

Turistar har i årevis valfarta til den falleferdige eigedomen og blitt skuffa fordi huset har vore så falleferdig. Etter at pinsekyrkja overtok huset for to år sidan, har dei gjort eit omfattande restaureringsarbeid. I dag var det høgtideleg opning av huset.

– Vi har gått over kvar ei fjøl og kvar ein spikar i heile huset og gjenskapt huset slik det var, fortel pastor Vidar Godø.

LES OGSÅ:

• Verneverdig hus forfell
• Mirakelhuset reddes
• Waldehuset i ilden

Ope for folket

Draumen om å overta mirakelhuset har ligge der dei siste 20 åra hos pastoren. Då han fekk høyre den sterke historia om mirakelhuset, vart ideen tent.

No vil han at den oppveksande slekt skal få bli kjent med historia, og det gjer ein best med å vere i huset og sjå kvar det skjedde, meiner han.

– Det gleder meg at folk vert så rørt av forteljinga, seier Godø. Planen er at huset skal vere ope for publikum to gongar i veka. Dei vil også leige ut lokalet til selskap.

Kjenner seg ikkje att

Huset vart høgtideleg opna av ordførar Bjørn Tømmerdal som brente ei snor, framfor inngangsdøra. To av dei som var svært spent på opninga, var systrene Gunvor Walde og Reidun Walde Langva. Dei er oppvaksne i huset og har gode minner her ifrå.

– Det er framand å sjå huset i dag, men dei har gjort eit storarta arbeid, skryt Gunvor Walde. Ho syntest det var trist å sjå korleis huset forfelt.

Såg ingen engel

Veslesyster Reidun Walde Langva hugsar godt at dei hadde toalett i bakgarden og måtte ha med stearinlys dit. Det var bestefaren deira som eigde huset då Ålesund brann, men dei har aldri prata med han om den dramatiske brannatta.

– Eg trur på historia. Eg hadde senga mi på same stad som Anders Nord seng, men eg såg aldri noko engel, fortel Reidun. Det gjorde heller ikkje Gunvor.

• Waldehuset var med i Linda Eide sitt program Norske attraksjonar. Sjå innslaget her: