– Me ber alle som var i området om å melde seg for politiet, seier operasjonsleiar Trygve Ødegård i Sunnmøre politidistrikt.
Branntilløpet har truleg starta då ein eingongsgrill vart forlate ved bygninga søndag ettermiddag.
Brannen vart sløkt av naboar som kom raskt til staden.
Foto: Joar ØdegårdPolitiet ber spesielt ein familie som var på staden søndag ettermiddag om å melde seg. Familien disponerer ifølge politiet ein blå VW Sharan.
Brannen skal ikkje ha fått tak i huset, ettersom den vart raskt oppdaga av naboar. Dei fekk raskt kontroll over brannen, og brannvesenet kom seinare til staden og gjennomførte ettersløkking.
– Folk må vere veldig forsiktige ved bruk av eingongsgrillar. Ein trur gjerne dei er sløkte sjølv om dei ikkje er det, seier operasjonsleiaren.
Grasbrann i Rogaland
Søndag har brannmannskap i Rogaland kjempa mot ein grasbrann i Gjesdal. Brannen vart meldt før klokka 15, og brenn framleis klokka 19.
- Les meir her:
Om lag 70 personar er med i sløkkingsarbeidet søndag kveld, og fleire stader i sør-Noreg skal det vere stor brannfare.
Søndag kveld måtte brannvesenet rykke ut for å sløkke ein grasbrann i Sjøholt i Ørskog kommune. Tidlegare denne veka fekk ein bustad på Ellingsøya i Ålesund brannskadar etter at ein grill stod for nær bordkledninga på huset.
Ber folk vere forsiktige
No ber politiet om at folk er merksame ved grilling.
– Eingongsgrillane bør haldast under vatn ei god stund, for å vere sikker på at dei er sløkte, seier Ødegård.
No håper han at alle som kjenner til branntilløpet i Eiksund søndag ettermiddag tek kontakt med politiet.
