Det er det norske kvinnelandslaget som måndag møter Israel på Høddvoll i Ulsteinvik. Men Palestinakomiteen på Sunnmøre meiner kampen aldri burde vore spelt, og ber folk droppe å gå på kampen.
– Det er mitt prinsipielle syn, ja. Akkurat sånn som vi tidlegare boikotta Sør-Afrika og sørafrikansk idrett, syns eg vi bør boikotte Israel, seier leiaren i Palestinakomiteen på Sunnmøre, Kjell Stephansen.
– Men burde ikkje ein klare å halde politikken unna fotballbana?
– Nei, kvifor det? Kvifor skal ikkje idrettsfolk bry seg om politikk, kontrar Stephansen.
Han viser til at fansen stilte med over 100 palestinske flagg under play-off-kampen for Champions League i Glasgow 17. august, mellom Celtic og eit israelsk lag. Stephansen meiner det også burde vore meir diskusjon rundt kampen i Ulstein måndag.
Les også:
Politiet fryktar ikkje bråk
Søndag ettermiddag hadde politiet og fotballforbundet møte med alle frivillige som skal i sving på Høddvoll i samband med landskampen. Men innsatsleiar Frode Halse Digernes trur ikkje at den spente situasjonen mellom Israel og Palestina skal føre til uro når dei israelske spelarane skal i aksjon.
– Nei, vi reknar ikkje med det, seier han, og legg til at ingen har søkt om løyve til å demonstrere i samband med kampen.
Han seier dei møter mannsterke fordi det er eit stort idrettsarrangement, ikkje fordi det israelske kvinnelandslaget skal i elden.
- Les også:
Vil dele ut løpesetlar
Palestinakomiteen ser ingen grunn til å halde seg unna. Dei har planlagt å dele ut løpesetlar før kampen på Høddvoll, og seier det er ein demokratisk rett.
– Vi kjem til å dele ut løpesetlar til dei som vil ha, dei som ikkje vil ha, skal få gå stille forbi, seier han.