Brannvesenet har ikkje båt - Øyfolket må lære å sløkke brann sjølv

Dei sjarmerande trehusa på Ona og Husøya på Romsdalskysten står tett i tett. Her i havgapet er det sjeldan vindstille og det kan bli katastrofalt.

– Startar det å brenne i eitt hus kan alt brenne ned. Det er berre ein meter mellom husa her vi står, seier Knut Bjørnar Sørmoen.

Han er leiar i velforeininga. Øysamfunnet har berre 16 fastbuande, men i helger og feriar er det mange hyttefolk og turistar. No får dei eit stort ansvar for brannberedskapen.

La ned beredskapsbåten

Folket på øya må sjølv starte førsteinnsatsen, for det kan ta opp mot ein time før brannmannskap er på plass.

Brannvesenet har nemleg ikkje eigen brannbåt og akkurat no har ikkje Ålesund kommune ein plan for korleis dei skal frakte mannskapet ut på øya.

– Det er uavklart om vi skal få tak i næraste, tilgjengelege båt, rekvirere ferja eller vente på ein ambulansebåt. Det tar lengre tid enn før. Beredskapen er svekka, seier Sondre Lervik, som er røykdykkar ved Steinshamn brannstasjon.

For kort tid sidan blei ambulansebåten Øyvon brukt som beredskapsbåt, men no er denne erstatta med ein mindre båt som ligg i nabokommunen.

– Vi må bruke tid på å finne ut kva som er tilgjengeleg av båtar under utrykking i staden for at båten ligg klar, seier Lervik.

Får opplæring

For å betre branntryggleiken på øyane får innbyggjarane difor kurs. Rundt 50 fastbuande og hyttefolk fekk prøve brannsløkkingsapparat og blei vist korleis brannslangar og anna utstyr fungerar.

Fire personar på øya har fått eit ekstra ansvar for branndepotet.

Ein av dei er Knut Bjørnar Sørmoen. Han føler seg slett ikkje klar til å sløkke ein brann før han har øvd og repetert meir.

– Vi lærer oss å bruke bilen og få ut slangane, men det er så mykje rundt det. Eg kan ikkje seie at vi føler oss gode nok, seier Sørmoen.

Dei fire med ekstraansvar går ikkje inn i ei vaktordning og i verste fall kan alle vere bortreist samstundes. Då må andre også vite kva dei skal gjere.

Er bekymra

Alle bustader er utstyrte med røykvarslarar og innbyggjarane får brosjyrar.

Liv Anne Øverås er glad for alle førebyggande tiltak, men slår seg likevel ikkje til ro med det.

– Når eg ser at dei ikkje ein gong har sikra båt til å komme ut hit, er det klart at vi er svært bekymra, seier Øverås.

Kan bruke redningshelikopter

Konstituert brannsjef i Ålesund kommune, Sindre Egeness, seier at dei jobbar med å få på plass ei løysing, og er både i dialog med privat båteigar og andre brannstasjonar som har båt.

– Vi har full forståing for at folk er bekymra og er samde i at den løysinga vi har i dag ikkje er god nok, seier Egeness. Han understrekar at brannvesen frå andre plassar også er pliktige til å hjelpe til dersom det brenn, og at det også kan settast inn redningshelikopter dersom veret tillet det.

– Det er viktig at dei lokale startar førsteinnsatsen, for det tar lang tid å kome til Ona uavhengig om vi har avtale med båt, seier Egeness.