NRK Meny
Normal

Båtar øydelagde i brann

Ein brann i ein seglbåt spreidde seg til to andre båtar. Rusa folk forstyrra naudetatane.

Brann i Ålesund

Ingen personar kom til skade, men tre båtar er øydelagde og to har varmeskadar etter brannen i Skarbøvika i Ålesund natt til søndag.

Foto: Remi Sagen / NRK

Det var dramatiske minutt i Skarbøvika i Ålesund natt til søndag.

Det braut ut brann i ein seglbåt i Skarbøvika i 04-tida. Brannen spreidde seg til to andre båtar.

Naudetatane rykte ut.

Rusa folk forstyrra naudetatane

Tre rusa personar var på brannstaden, og naudetatane vart forstyrra i arbeidet. Dei fekk klar melding frå ordensmakta om å forlate staden.

Den eine av dei, ein mann i førtiåra, nekta å rette seg etter pålegget. Av politiet blir han karakterisert som plagsam.

– Han oppførte seg på ein slik måte at vi måtte ta han med oss og sette han i arresten, seier John Bratland i politiet.

– Kan dei rusa folka ha hatt noko med brannen å gjere?

– Ingen ting tyder på det, seier operasjonsleiar John Bratland i Sunnmøre politidistrikt til NRK Møre og Romsdal.

– Det var truleg ingen folk i båtane då brannen braut ut, seier han.

Mykje røyk i området

Klokka 4.36 melde politiet at brannen var sløkt. Det var mykje røyk i området, men ingen bebuarar vart evakuerte.

Etterforskar saka

Tre båtar er utbrende, og minst to båtar er varmeskadde.

Politiet i Ålesund etterforskar saka. Utover søndagen skal dei arbeide med å prøve å finne årsaka til brannen.