FHI ber folk halde avstand i naturen – truleg auka fare for å verte smitta ute

På fugleøya Runde er alle ute etter eit glimt av det same; lunde, også kalla sjøpapegøye.

No er hekkesesongen i gang. Då kjem tusenvis av fugl – og turistar til øya.

Campingplasseigar Knut-Asle Goksøyr ristar på hovudet og ser utover ein full parkeringslass.

– Det går ei grense for kor mykje folk ein toler å ha her. Det er ikkje slik at alle desse folka er spreidd ut over fjellet. Alle skal opp på nøyaktig same plassen, seier han.

Den vesle øya Runde har det sørlegaste fuglefjellet i Noreg. Øya er ein av dei største turistattraksjonane i Møre og Romsdal.

Goksøyr delte dette bildet då ein folkehøgskule, i tillegg til andre turistane, kom på utflukt til fuglefjellet.

Større smittefare

Overlege ved Folkehelseinstituttet, Preben Aavitsland, ber folk tenkje seg om i naturen.

Han peikar på at den engelske varianten av koronavirus no er dominerande i Noreg. Samstundes er det grunn til å tru at fleire går rundt med smitte utan å vite om det.

– Vi trur nok sjansen for å bli smitta utandørs er større i år enn i fjor. Det er viktig at ein hugsar å halde avstand, også i naturen, seier Aavitsland.

Handsprit på fjellet

På Rampestreken i Romsdalen og Trolltunga i Hardanger vert det sett inn vakter for å organisere turistkøen.

– Vi fekk litt sjokk ei langhelg i mai i fjor. Pluselig sto folk tett i kø. Det verka som folk gløymde at smittevern også gjeld på tur, seier leiar i Romsdal Tindesenter, Ivar Brennhovd.

– Me sender opp vakter og handsprit for å passe på at besøket på Trolltunga er trygt. Det har me gode erfaringar med, seier ordførar i Ullensvang, Roald Aga Haug.

Ved Preikestolen i Rogaland var det parkeringskaos i fjor. Dei har vakter og informasjon rundt parkeringsplassen, men ikkje ute i terrenget.

– Kvar enkelt har ansvar for å halde avstand, også i naturen. Vi har ikkje moglegheit til å passe på oppe på fjellet, seier leiar i Stiftelsen Preikestolen Helge Kjellevold.

Bør ikkje bli heime

Aavitsland i FHI håpar likevel at folk kjem seg ut på tur. Men peikar på at ein bør tenkje over at folk ein møter på turen kan vere smitta utan å vite det sjølv.

– Ein skal ikkje la vere å gå i naturen på grunn av frykt for korona, men eg håpar folk planlegg turen. Ein er no ikkje nøydd til å gå på Preikestolen og liknande stader, for der kan det bli ganske trongt, seier Aavitsland.