Leikar med livet i jakta på draumebiletet: – Det kan vere det siste du gjer

– Det kan i verste fall vere det siste du gjer, eller det siste du let ungane dine gjere, seier Merete Løvoll Rønneberg.

Ho er formidlingsleiar i Stiftinga Geirangerfjorden Verdsarv.

Løvoll Rønneberg er mildt sagt uroa over åtferda til mange turistar som har besøkt Geiranger denne sommaren.

Dei klatrar over sperringane på Flydalsjuvet ved Geirangerfjorden og går heilt ut til ei fjellhylle.

Der hoppar turistane opp og ned, eller klatrar ut mot kanten – for å få det optimale sommarbiletet.

Om ein fell ned er det heile 150 meter ned til bakken.

Dagleg turistgalskap

Også då NRK besøkte Geiranger for å lage reportasje om det spesielle fenomenet, etter fleire tips frå lokalbefolkninga, såg vi turistar som leika seg på kanten mange gonger.

Ein kan trygt seie at «turistgalskapen» skjer i Geiranger dagleg om sommaren.

– Slike attraksjonar blir selde på nettet via Instagram og andre sosiale medium. Målet er å gjere det same som andre har gjort – utan å tenke på kor risikofylt det kan vere, seier Merete Løvoll Rønneberg.

– Likar spenninga

Men spenninga er ein del av «greia», meiner fleire turistar.

– Eg vart litt skremt, men eg likar spenning i kvardagen, seier den finske turisten Mikael Larimo.

– Eg såg gjerdet, men vi veit jo at vi gjer det på eigen risiko, legg Larimo til.

– Må tenke sjølve

Ifølgje Merete Løvoll Rønneberg er det så langt ikkje vurdert ekstra sikringstiltak ved Flydalsjuvet.

– Folk klatrar over gjerdet og gir blaffen. Folk må tenke sjølve. Vi kan ikkje ta frå folk ansvaret for seg sjølve, meiner Løvoll Rønneberg.

Så langt har ingen alvorlege ulykker skjedd grunna fotografering ved dette punktet i Geiranger, men ved Stigfossen i Trollstigen mista ein mann livet under fotografering tidlegare i sommar.

Også i Sogn og Fjordane og Nordland har det vore eit problem at turistane set seg sjølve i livsfare.