Arbeidde i 12 år som sjukepleiar utan autorisasjon

Det er Sunnmørsposten som tysdag ettermiddag skriv om det dei omtalar som ein tilsetjingstabbe.

For først etter nesten 12 år oppdaga sjukehuset at ein av sjukepleiarane aldri har hatt autorisasjon.

Varsla sjølv Fylkesmannen

Assisterande fylkeslege Cato Innerdal hos Fylkesmannen seier til avisa at det var Helse Møre og Romsdal som sjølv varsla om at dei hadde oppdaga at autorisasjonen mangla.

– Eg har ingen kommentar utover at det er oppretta tilsynssak, seier Innerdal til Sunnmørsposten. Avisa skriv at sjukepleiaren no er oppsagt.

Meiner kvinna har brote tilliten

Personalsjef Olav Finnøy seier til Sunnmørsposten at dette er ein klar svikt.

– Dette er ein grov systemsvikt, seier han, og avviser at noko slikt kunne skjedd i dag.

Han meiner kvinna har misbrukt tilliten til arbeidsgjevaren sin.

Det skal ikkje ha kome inn klagar på kvinna.