Tysdag ettermiddag røysta 27 mot og 18 for anke, dermed blir det ingen runde i Høgsterett, slik mindretalet ønskte.
Debatten om kvar det nye sjukehuset for Nordmøre og Romsdal skal plasserast, har vore heftig debattert frå første stund.
– No er jobben vår å jobbe for sjukehussaka utanfor rettsalen, i dialog med helseføretaket, sa ordførar Kjell Neergaard (Ap) tysdag kveld.
Intens kamp om kvar sjukehuset skulle ligge
Då det blei bestemt at sjukehuset skal plasserast på Hjelset i Molde, blei det ramaskrik lenger nord i fylket. Det resulterte i at Kristiansund kommune gjekk til sak mot Helse Midt-Noreg. Under opninga av rettssaka karakteriserte Kristiansund kommune sin advokat, Kjetil Vedervang, prosessen som pil roten.
Men dei vann ikkje fram, og tapte både i tingretten og i lagmannsretten.
– Saka har blitt rettsleg vurdert svært grundig både i tingretten og lagmannsretten, og eg ser ikkje at det blir noko anna rettsleg resultat, det er fånyttes, slik eg ser det, sa bystyrerepresentant Per Sefland (V) rett i forkant av avrøystinga tysdag ettermiddag.
Les også:
– Vil fullføre løpet
Men ikkje alle var samde med Sefland. Berit Frey (Sp) meiner saka ville tent på ein runde til i retten.
– Vi vil fullføre det løpet vi har begynt på, og det meiner eg det var semje om i bystyret i juni 2015, då vi bestemte oss for å gå til rettssak, seier ho.
Ho får støtte av Geir Nordli frå Helsepartiet.
– Eg er sikker på at det er rett, både på grunn av dei prosessane som har vore og den urettferdige behandlinga, seier han.
Ho seier ingen i bystyresalen har kompetanse til å vurdere om saka bør prøvast for Høgsterett.
Tidlegare i august blei det klart at Kristiansund tapte saka mot Helse Midt-Noreg igjen. Retten var ikkje samd med politikarane om at vedtaket om plasseringa av det nye fellessjukehuset var ugyldig.
Kommunen tapte først i tingretten, men anka, og tapte også i lagmannsretten.
Meiner løpet er fullført
Sefland meiner det bør vere nok med to rundar i retten, og var ein av dei som røysta imot å gå vidare med saka til Høgsterett. Slik blei også vedtaket i bystyret tysdag.
– Eg syns heile saka må stoppe, ein har sprunge heile løypa heilt til endes, no må ein legge den bak seg, og satse meir på å få eit best mogleg helse- og omsorgstilbod for Kristiansund og Nordmøre, la Sefland til.