Nokre meter frå land ved Åse reinseanlegg har det samla seg ei stor mengde fuglar. Dei har fått ferten av at kloakk frå rundt 20 000 personar renn ureinsa ut i fjorden.
Sidan helga har reinseanlegget vore ut av drift. Alarmen gjekk frå nabobedrifta laurdag kveld, då stoffet polystyren blei sleppt ut på avløpsnettet. Kjemikalien har klistra seg som tyggegummi til filtra i reinseanlegget.
– Den mest alvorlege konsekvensen er utslepp av ureinsa avløpsvatn, seier Arve Olav Bang som er verksemdsleiar for vatn og avløp i Ålesund kommune.
Dei jobbar no på spreng for å spyle og reingjere leidningsnettet og reinseanlegget. Det var Sunnmørsposten som skreiv om saka først.
Går gjennom rutinane
Bedrifta Sunde produserer polystyren, som blir brukt i blant anna isolasjon og emballasje.
– Det er sjølvsagt uheldig at reinseanlegget er ute av drift og kloakk går ureinsa til sjø. Vi går gjennom rutinane våre og utstyr for å sikre at dette ikkje skal skje igjen, seier direktør Rolf Fagervoll.
Det er usikkert kor mykje polystyrenmasse som har kome inn i reinseanlegget, men det kan vere om lag 25 kilo.
Svært uvanleg
Miljødirektoratet ser alvorleg på saka og krev no svar på korleis dette kunne skje.
– Dette er eit eksepsjonelt tilfelle. I alle mine år har eg ikkje høyrt at ei bedrift har greidd å sette eit kommunalt reinseanlegg fullstendig ut av drift, seier Harald Sørby. Han er seksjonsleiar i Miljødirektoratet.
Dei prøver no å finne årsaka til det som skjedde, og om det var eit uhell eller om det er ein systemfeil.
– At ei bedrift sender utslepp i eit kommunalt reinseanlegg er ein avtale mellom kommunen og den enkelte bedrift. Då må dei finne ut om det er hensiktsmessig og forsvarleg, seier Sørby.
Også Statsforvaltaren i Møre og Romsdal ser alvorleg på saka.
Linda Aaram i miljøvernavdelinga seier at tidspunktet det skjedde på er uheldig, fordi det føregår fiske i Borgundfjorden.
– Det viktige no er at kommunen får reparert skadane så fort som mogleg. I etterkant må ein undersøke kva konsekvensar dette har fått for miljøet, seier Aaram.
Fiskeridirektoratet er også varsla. Dei seier at Borgundfjordfisket ikkje er skikkeleg i gang før i mars.
Frarår fiske og bading
Ålesund kommune seier at dei er i løpande dialog med kommunelegen og at dei vil ta regelmessige vassprøver for å overvake forureininga.
– Vi åtvarar mot bading og fiske eller fangst av fisk og skaldyr i sona rundt Åse reinseanlegg til prøvene viser gode resultat, seier Arve Olav Bang. Kystverket er varsla om hendinga.
Bang håper at anlegget skal vere oppe og gå igjen neste veke.