Lagmannsretten startar behandlinga av drapet på Kirsti Slinning i dag

Ein mann blei dømd til fengsel i 12 år for drapet. Men både mannen og statsadvokaten anka saka.

Verken forsvaret eller påtalemakta kjem til å legge fram prinsipielt nye argument, og berre i beskjeden grad nye vitne.

• Les også: Kvinna blei kvelt

Ny og høgare rettsinstans

Dermed er det store poenget med denne behandlinga i lagmannsretten å få brynt dei same argumenta, fakta, vitneutsegnene og vurderingane i ein ny og høgare rettsinstans.

Også i Lagmannsretten kjem dermed mannen som i Tingretten blei dømd til fengsel i 12 år til å nekte straffskuld. Han vil halde fast på at han ikkje hugsar noko av noko drapshandling, og at han dermed ikkje kan vedgå straffskuld.

• Les også: Erkjenner ikke straffskyld
• Les også: – Sjalusi og en følelse av å ha blitt avvist førte frem til drapet

Sjalusi og sinne

Aktor vil halde fast ved påstanden om fengsel i 14 år, om det ikkje kjem fram nye og oppsiktsvekkjande opplysningar. Aktor Magnye Nyborg seier til NRK at han også i Lagmannsretten byggjer på same argumentasjon som i Tingretten.

Dette inneber at aktoratet vil byggje opp ein argumentasjon kring gjerningsmannens tiltakande sjalusi og sinne. Aktor vil vise at mannen i sjalu og sinne, og påverka av alkohol, drepne Kirsti Slinning på ein balkong på Hotell Alexandra like over midnatt 13. oktober i fjor.

• Les også: – Han heldt hendene om halsen på henne
  

Nedsett minne

Der gjerningsmannen viser til tap av minne og nedsett medvit, vil aktor hevde at dette ikkje reduserer straffeansvaret.

– Sjølvpåført rus reduserer ikkje noko straffeansvar, seier statsadvokat Magne Nyborg til NRK.

• Les også: – Mannen var medviten under sjølve drapet

Lagt i narkose

Aktoratet fører eitt nytt vitne under Lagsmannsrettssaka. Dette vitnet var med på å leggje gjerningsmannen i narkose i timane etter drapet. Bakgrunnen for denne behandlinga, var at også gjerningsmannen var skadd i samband med handlingane på hotellet.

– Men denne narkosen blei gitt lenge etter sjølve drapshandlinga, seier Nyborg.

Fagforeningskonferanse

Kirsti Slinning og mannen som blei dømd i Tingretten hadde vore kjærastar, med nokre avbrot, nokre månader før dei møttest på fagforeiningskonferansen i Molde. Under behandlinga i Tingretten kom det fram at forholdet blei brote nokre gonger. Vitne fortalde at mannen hadde vore sjalu, medan Kirsti Slinning var sosial og likte seg i sosiale samanhengar.

Under rettssaka blei det ført vitne som fortalde om sjalusien og sinnet, både i samband med fagforeiningskonferansen og andre samanhengar Slinning og gjerningsmannen deltok i. Gjerningsmannen avviste i Tingretten at dei hadde eit problematisk forhold.