Ålesund varslar strengare tiltak etter smitteutbrot

Hopp til innhold

Sidan torsdag har over 40 testa positivt for korona i Ålesund. Dei fleste smittetilfella er relatert til to restaurantar.

I dag hadde kommunen krisemøte for å stanse utbrotet. Ordførar Eva Vinje Aurdal (Ap) er bekymra.

– Det er den mest alvorlege situasjonen vi har vore i fram til no, seier Aurdal. Ho ber innbyggjarane om å ikkje slurve med smittevernet.

Stenger treningssenter og aktivitetsparkar

Ålesund, Sula og Giske innfører no ei strengare lokal forskrift som gjeld frå midnatt 26. april og fram til midnatt 9. mai.

Dette inneber stenging av blant anna treningssenter og aktivitetsparkar, saman med skjenkestopp på alkohol, og forbod mot arrangement.

Det er plikt til å bruke munnbind på til dømes butikkar når det ikkje er mogleg å halde ein meters avstand. Det er også påbod om heimekontor. NTNU i Ålesund skal ha digital undervisning.

Maks to gjestar

Kommunane tilrår maks to gjestar på besøk heime og maks ti nærkontaktar i veka. Ein oppmodar også om å unngå unødige reiser.

– Dette er strenge tiltak. Følgjer vi desse trur vi at i løpet av 14 dagars periode skal kunne klare å slå ned smitteutbrotet, seier Aurdal.

Kommunen har vore i dialog med FHI og Statsforvaltaren som ikkje tilrår å sette skolar og barnehagar på raudt nivå som eit førebyggande tiltak. Det blir i staden tiltak på skular der det oppstår smitte.

Russefeiringa blir flytta

Forbodet mot arrangement gjeld også russane. Kommunen er i dialog med russepresidentane og har kome fram til at ein skal flytte russefeiringa til 15. juni, dersom ikkje smittesituasjonen tilseier noko anna.

Etter planen skulle russane i Ålesund, Giske og Sula starte feiringa 1. juni.

Smitte frå to utestader

Kommuneoverlege Olav Mestad seier at minst 35 personar er smitta frå to restaurantar. Det var fint ver 17. og 18. april og svært mange var samla på utestadane. Det har i etterkant vore vanskeleg å få oversikt og varsla dei som var på dei to restaurantane.

– Smittesituasjon er uoversiktleg. Mange er i karantene. Det er nærkontaktar, skuleklassar, barnehagar og helseinstitusjonar, seier Mestad. Han har ikkje tal på kor mange som sit i karantene no.

Smittesyndebukk

Smittesporinga har vore krevjande med mange nærkontaktar. Det er også frivillig å registrere seg ved restaurantane og svært få har gjort det.

Restauranten Toldboden får kritikk frå gjestar som meiner smittevernreglane blei brotne. Ein gjest NRK har snakka med hevdar folk sat for tett, at dei gjekk mellom borda og at det var allsong.

Dagleg leiar Henrikke Røder avviser kritikken og meiner reglane har blitt følgt. Ho opplever at Toldboden har blitt smittesyndebukk. Halvparten av dei tilsette som var på jobb førre helg er smitta.

Kommunedirektør Astrid Eidsvik seier at dei vil samle inn opplysningar dei har fått om at smittevernet ikkje er følgt og aksjonere deretter når dei har fått oversikt.

Slurva med reglane

Ordførar Aurdal trur smitten skuldast at folk har hatt for lave skuldrer og slurva med smittevernreglane.

– Vi hadde møte med utelivsbransjen søndag og konklusjonen var at der er meir å gå på enkelte plassar i forhold til å ta smittevernet på alvor. Dessverre, seier Aurdal.

Ingen er så langt politimeld, den vurderinga blir tatt i etterkant.

Også før påske var det smitteutbrot i Ålesund. Då innførte kommunen påbod om munnbind, skjenkestans og heimekontor. Den lokale koronaforskrifta vart oppheva 13. april.

Desse reglane gjeld i Ålesund, Sula og Giske frå midnatt 26. april

Stenging av verksemder:

Følgande verksemder og stader skal halde stengde:

Treningssenter, likevel slik at følgande tilbod kan halde opent:
1. Rehabilitering og opptrening som blir tilbydd individuelt eller i mindre grupper med arrangør.
2. Individuell trening og behandling som det kan bestillast time til.
Symjehallar, badeland, spaanlegg, hotellbasseng og liknande, likevel slik at følgande tilbod kan halde opent:
1. Skolesymjing, organiserte symjekurs og organisert symjetrening for personar under 20 år og symjing for profesjonelle utøvarar.
2. Behandling, rehabilitering og opptrening som blir tilbydd individuelt eller i mindre grupper med arrangør.
3. Annan individuell behandling som det kan bestillast time til og der bad er ein del av behandlinga.
Fornøyelsesparkar, bingohallar, spelehallar, leikeland, bowlinghallar og tilsvarande stader.
Kino, teater, konsertstader og tilsvarande kultur- og underholdningsstader.
Andre offentlege stader og verksemder der det skjer kultur-, underhaldnings- eller fritidsaktivitetar som samlar menneske innandørs.
Offentlege stader og verksemder der det skjer organiserte kultur-, idretts- og fritidsaktivitetar kan halde opent for barn og unge under 20 år, det same gjeld utandørs aktivitet for vaksne og organisert trening innandørs og utandørs for toppidrettsutøvarar.

Forbod mot gjennomføring av arrangement:

Det er ikkje tillate å gjennomføre arrangement med unntak av:

Gravferder, bisettingar og seremoniar ved grav med inntil 50 personar til stades
Andre livssynssamlingar med seremoniar i trus- og livssynshus, inkludert seremoniar ved vigslar, dåp, konfirmasjon med inntil 20 personar til stades.
Digitale arrangement med maksimalt fem personar til stades, i tillegg til utøvarar og anna nødvendig produksjonspersonell.
Utandørs treningskampar i fotballens to øvste divisjonar for kvinner og menn med berre spelarar, støtteapparat og dommarar til stades.

Påbod om heimekontor:

Arbeidsgivarar skal sørge for at tilsette arbeider heimanfrå så langt det er praktisk mogleg. Arbeidsgivarar skal kunne dokumentere at det er gitt beskjed til dei tilsette om korleis dette skal gjennomførast i verksemda.

Skjenkestopp:

Serveringsstader som har skjenkebevilling etter alkoholloven kapittel 4 og 5 skal ikkje utøve skjenkebevillinga

Digital undervisning:

Universitet, høgskolar og fagskolar skal halde sine lokale stengde for elevar og studentar slik at undervisninga skjer digitalt

Stans av idretts- og fritidsaktivitetar for vaksne

Det er ikkje tillate å organisere idrettsaktivitet innandørs for personar over 20 år. Det same gjeld fritidsaktivitetar som organiserte øvingar, trening og prøver for kor, korps og teater. Organisert trening for toppidrettsutøvarar innandørs er likevel tillate.

Plikt til å bruke munnbind:

Når det ikkje er mogleg å halde minst ein meters avstand, ut over kortvarige passeringar til andre enn husstandsmedlemmar, skal det brukast munnbind i butikkar, i fellesareal på kjøpesenter, på serveringsstader, i trus- og livssynshus, på kollektivtransport og innandørs stasjonsområde, og i lokale for kultur-, sports- og fritidsaktivitetar.

Passasjerar skal bruke munnbind i taxi. Munnbindet skal takast på før passasjeren set seg inn i taxien, og skal ikkje takast av før reisa er avslutta og passasjeren har gått ut av taxien. Plikt til å bruke munnbind gjeld tilsvarande for sjåfør når det er passasjer i taxien.

Plikta til å bruke munnbind i første ledd gjeld tilsvarande for tilsette på stader der det ikkje er mogleg å halde minst ein meters avstand frå besøkande. Dette gjeld ikkje tilsette på stader der det er sett i verk andre tiltak mot smitte for dei tilsette som bruk av visir, skiljeveggar o.l. i samsvar med Folkehelseinstituttets tilrådingar.

Plikta til å bruke munnbind gjeld ikkje for barn under 12 år, eller for dei som av medisinske eller andre årsakar ikkje kan bruke munnbind.

Lokale råd for Ålesund, Sula Giske:

Kommunane tilrår maks to gjestar på besøk heime per dag.
Maks 10 nærkontaktar i løpet av ei veke, utanom klasse og arbeidskolleger.
Oppmodar om å halde minst to meter avstand til andre.
Innbyggarane bør handle lokalt, og kun oppsøke kjøpesenter når det er nødvendig.
Unngå unødige reiser.