Påbod om munnbind i Ålesund etter smitterekord

Dei siste vekene har Ålesund hatt rekordmange tilfelle av koronavirus med opp mot 80 smitta på ei veke.

No innfører sunnmørsbyen lokale smitteverntiltak saman med nabokommunen Sula.

– Smitta er knytt til private festar, utelivet, enkelte bedrifter og arbeidsfellesskap, og til innreise, seier varaordførar Vebjørn Krogsæter.

Dei lokale tiltaka er:

• Krav om munnbind på stadar det ein ikkje kan halde ein meters avstand.
• Skjenkestadar, restaurantar, kafear og kantiner skal krevje at gjestar legitimerer og registrerer seg. Gjestar som ikkje registrerer seg, skal avvisast.
• Gjestar og tilsette skal bruke munnbind/ansiktsmaske når dei beveger seg i lokalet og det er fare for at avstandskravet på ein meter ikkje kan overhaldast.

Det vert framleis grønt nivå i skular og barnehagar. Men kommunane kan på kort varsel innføre gult nivå dersom smittesituasjonen tilseier det.

Forskrifta gjeld til og med 6. september.

I tillegg til påboda, kjem kommunane med følgjande råd:

• Maks 10 personar på besøk heime og private sosiale lag, med unntak for vaksinerte.
• Reduser tal på nærkontaktar.
• Heimekontor for dei som har moglegheit, og som er avhengig av kollektivtrafikk.

Pressa smittesporing

Kommuneleiinga var alvorstyngd då dei møtte pressa måndag kveld. Laurdag sette Ålesund smitterekord. Då fekk 30 personar stadfesta koronasmitte.

Per i dag er 100 smitta og i isolasjon i Ålesund.

Dei høge smittetala har lagt press på kapasiteten for smittesporing.

– Heldigvis har vi ein gjeng som kastar seg rundt nær sagt til alle døgnets tider og gjer alt dei kan for å få oversikt. Dei gjer ein utruleg god og viktig jobb, og vi ber alle om å bidra slik at arbeidet deira vert lettare, seier kommuneoverlege Olav Mestad.