– Vi har vore i samtalar med Sogn og Fjordane. Og vi skal ha fleire, seier Stranda-ordførar Jan Ove Tryggestad. Han er nyvald styreleiar i Sunnmøre Regionråd.
Tryggestad har tatt over etter hareidsordføraren Anders Riise, som ivra for å sjå sørover.
Vil følge nøye med
– Eg trur ikkje han og eg er så langt frå kvarandre. Vi veit at dette er ei sak for fylket, men vi i Sunnmøre Regionråd skal følge prosessen nøye, seier han.
– Vi skal ikkje sitje rolege i båten. Når nordmørskommunar seier at dei vil til Trøndelag, må vi kunne snakke med Sogn og Fjordane, seier senterpartiordføraren.
– Har mykje til felles
Tryggestad meiner sunnmøringane har mykje til felles med dei på andre sida av fylkesgrensa. Det gjeld både næringsliv og kultur.
– Dette blir nok ei stor sak, som ikkje blir avgjort med det første, seier den nye styreleiaren i Sunnmøre Regionråd.