Laurdag klokka 14.00 la sommarbåten MS «Sjøkurs» til kai ved Kommunekaia midt i Ulsteinvik sentrum. Både på kaia og i båtar på sjøen, hadde fleire tusen menneske samla seg for å ønske dei velkommen.
– Den var nok den beste til no. Eg trur vi talde minst tre hundre båtar som følgde oss inn mot hamna. På kaia var det fullt av folk og skikkeleg 17. mai-stemning. Det er klart det gjer inntrykk, seier han.
Saman med Nadia Hasnaoui leiar Pettersen tv-sendinga direkte frå Ulsteinvik klokka 21:40 laurdag kveld.
- Les også:
Håpar på like mange oppmøtte
Fredagen var båten i Molde, og det vart både feststemning og frieri på storkaia i romsdalsbyen.
– Sendinga frå Molde blei veldig bra. Stemninga var fantastisk, vêret var fint og vi møtte mange flotte menneske, seier Pettersen.
Han kan love eit like tettpakka program med lokale gjestar og gode historier i Ulsteinvik laurdag kveld, og håpar på ein skikkeleg folkefest i kystbyen.
– Vi skal gjere vårt beste for å vise fram Ulsteinvik på ein god måte. Eg håpar det kjem minst like mange folk som tidlegare i dag, om ikkje enno fleire, seier Pettersen og smiler.
- Les også:
Minne for livet
Pettersen, som gjekk om bord i båten førre søndag, fortel at turen nedover kysten har vore ei unik oppleving.
– Høge fjell og lange fjordar. Det er vanskeleg å beskrive kor vakkert det er, ein må nesten oppleve det sjølv, seier han.
Sommarbåten har vekt stort engasjement på si reise sørover og Pettersen føler seg heldig som får vere ein del av det heile.
– Det er utruleg morosamt å sjå kor mykje det engasjerer folk. Klokka kan vere to på natta og likevel står det folk på ein holme med flagg og vinkar til oss, seier han.
– Det er stas å få vere med på dette. Det er eit minne for livet, held han fram.
- Les også:
Sommeråpent direkte frå Ulsteinvik
Laurdag kveld kan tv-sjåarane oppleve Sommeråpent direkte frå Ulsteinvik klokka 21.40.