Debatten om det politiske debattklimaet tok fyr då listetoppen i Nordmørslista, Steinar Wiik Sørvik, karakteriserte attvalet av stortingsrepresentant Else May Botten i sentralstyret i Arbeidarpartiet for tortur. Facebookposten med skuldingane om tortur blei først delt på i ei lukka gruppe på Facebook. Seinare blei posten delt på Nordmørslista sin opne Facebook-konto.
– Skulle ikkje ut offentleg
NRK var i kontakt med Steinar Wiik Sørvik tidleg torsdag, medan han var på veg til eit møte i retten. I denne samtalen forsvarte Wiik Sørvik at han hadde publisert Facebook-posten.
– Posten blei publisert i ei lukka gruppe på Facebook og var ikkje meint for det offentlege rom. Eg veit ikkje kven som har publisert dette vidare på Twitter-kontoen til Nordmørslista, seier Wiik Sørvik.
– Utruleg at dette kan kallast tortur
Else May Botten seier sjølv til NRK at ein slik måte å omtale politiske motstandarar på ikkje samsvarar med måten ein skal behandle kvarandre på i samfunnet.
– I politikken brukar vi å diskutere sak. Her er det nokon som går til personangrep på ein ganske spesiell måte. Det er heilt utruleg at nokon kan kalle det å bli vald inn i eit sentralstyre for tortur, seier Botten.
Botten seier at Steinar Wiik Sørvik har teke debatten inn på eit nytt nivå. Ho har denne karakteristikken av ordbruken.
– Det er rett og slett dårleg folkeskikk. Eg trur verken Mørebenken eller andre parti meiner at det er på denne måten vi skal kommunisere. Sørvik har aldri hatt nokon samtale med meg nokon gong. Så dette er litt spesielt, seier Botten.
Initiativtakar Tove Lise Torve (Ap) medan Iver Nordseth (V) signerer oppropet.
Foto: Trond Vestre / NRKOpprop mot trakassering og sjikane
Torsdag signerte alle gruppeleiarane i fylkestinget i Møre og Romsdal eit opprop mot det dei kallar sjikane og trakassering i valkampen.
– Vi ser ein tendens i sosiale medium at ordbruken er til dels grov og stygg og at det blir teke i bruk personsjikane. Utspelet frå Steinar Wiik Sørvik er ein del av bakteppet for initiativet. Den som er folkevald og den som har ambisjonar om å bli folkevald har eit særleg ansvar for å vareta debattklimaet i demokratiet Noreg, seier Torve.
Torve omtalar utspelet til Steinar Wiik Sørvik som personhets og sjikane. Ho kallar utspelet for trist.
– Brukar hersketeknikkar
I samtalen med Wiik Sørvik seier han at arbeidarpartirepresentantar brukar hersketeknikkar når dei no reagerer på måten han uttrykkjer meiningane sine i sosiale medium.
NRK har forsøkt å få ein intervjuavtale med Steinar Wiik Sørvik. Han har vore oppteken i retten, og dette har så langt ikkje late seg gjere. Wiik Sørvik skal vere tilgjengeleg for ein kommentar fredag.
