Avisa Dagbladet skriv tysdag kveld at den 15 år gamle jenta kom i kontakt med ein mann via internett. Tidlegare denne månaden tilbaud mannen jenta deltidsjobb om ho møtte til jobbintervju. Ifølgje meldinga som politiet har teke imot blei jenta valdteken under dette jobbintervjuet.
– Vi fekk melding om valdtekta den 19. januar. Valdtekta skal ha skjedd nokre dagar før, seier etterforskingsleiar Arild Angen til Dagbladet.
– Nektar straffskuld
Forsvararen til mannen, Peter Engebjerg, seier til NRK at mannen nektar straffskuld, og at han stiller seg uforståande til skuldingane.
– Mannen har site ei veke i varetekt. Han har forklart seg for politiet. Han har samarbeidd og stilt seg til disposisjon for politiet, seier advokat Peter Engebjerg til NRK.
Er ute av varetekt
Næringslivsleiaren blei pågripen dagen etter, den 20. januar. Han blei då varetektsfengsla og sikta for valdtekt.
– Det er gjort beslag og mannen er avhøyrd. Vi bad om varetekt i 14 dagar, men fekk berre ei veke, seier Angen.
Dette inneber at mannen kom ut av varetekt den 27. januar. Politiet reknar ikkje med at mannen kan øydelegge noko prov, og opplyser at dei har kome eit god stykke i etterforskinga.
– Skal føle seg trygge
Jenta har fått bistandsadvokat. Dette er Grete Melbye Sæter. Ho seier ho er forferda over at ein 15-åring skal oppleve ein valdtekt midt på ljose dagen i Molde.
– Alle 15-åringar skal kunne føle seg trygge for at slik ikkje skal kunne skje, seier Grete Melbye Sæter til Dagbladet.
– Viktige spor er sikra
Melbye Sæter seier også at det ikkje er noko i saka som gjer at jenta skal frykte for at ho ikkje blir trudd.
– Det er gjort beslag og det er sikra viktige spor under avhøyra av vitne og den sikta, seier ho.
NRK har vore i kontakt med bistandsadvokaten. Ho seier ho ikkje kjenner til korleis den sikta stiller seg til skuldingane.
