NRK Meny
Normal

Hotelldirektør rasar mot Telenor etter langvarig brot på naudsambandet

Hotellnæringa på Øye er illsinte på telegiganten. Dei meiner at dei blir nedprioritert.

hotel union øye og direktør mariann øye-mork

Direktøren ved Hotel Union Øye seier at dei har hatt store utfordringar utan telenett. No er sambandet oppe igjen, men direktøren fryktar at det kan skje igjen.

Foto: Union Hotel Øye/NRK

Mariann Øye-Mork

Direktør ved Hotel Union Øye, Mariann Øye-Mork, er ikkje nøgd med kundeservicen frå Telenor.

Foto: Hotel Union Øye

I løpet av dei to siste vekene har Øye i enden av Norangsfjorden vore utan både fasttelefon, mobilnett og tilgang til naudsambandet i rundt 6 døgn til saman. Hotelldirektøren ved Hotel Union Øye er svært frustrert og meiner at Telenor ikkje prioriterer sunnmørsbygda fordi dei har berre 42 fastbuande. Telenor legg seg langflat.

– Arrogant kundeservice

Hotelldirektør Mariann Øye-Mork har prøvd å få tak i Telenor fleire gonger, men ho opplever kundeservicen som arrogant og uhøfleg. Sjølv hevdar ho at ho ikkje har fått skikkelege svar frå selskapet. Avisa Mørenytt var dei første som omtalte saka.

– Om det hadde skjedd noko alvorleg så kunne det fått heilt katastrofale konsekvensar. Viss bygda stod i brann så hadde vi ikkje fått kontakt med dei naudetatane som er nødvendig.

Hotelldirektøren har ansvaret for alle gjestane, og ho meiner at situasjonen kunne blitt spesielt farleg for dei.

– Brann i eit gammalt trehotell hadde mildt sagt vore ei katastrofe. Men vi er òg avhengige av å ha telefondekning viss folk eller dyr blir skadde, seier Øye-Mork. Ho fortel at det er ikkje mange vekene sidan ein mann fekk hjarteinfarkt, og hadde det ikkje vore for at dei hadde telenett akkurat då så kunne det gått veldig gale.

Vanlegvis har hotellet ein person på vakt om natta, men i denne perioden har dei alltid hatt to i tilfelle noko skulle skje. Det har gjort at utgiftene har stige.

Telenor retta feilen

Søndag ettermiddag fekk bygda beskjed om at saka hadde høgste prioritet. Alt tilgjengeleg mannskap vart kalla ut fordi dei såg at mangel på dekning var ein fare for helse og sikkerheit. Etter fleire veker med ustabilt telenett har Telenor retta feilen.

– Vi har ikkje fått noko god forklaring frå Telenor. Det snakkar seg berre vekk. Internett har vore redninga, og vi har kommunisert via Facebook med kundeservice. Når ein ikkje får tak i naudetatane så må dei vere raskare på bana.

IT-gruppa i hotellkonsernet har klart å fått tak i selskapet på telefon, men opplever at dei ikkje har fått skikkelege svar.

– Telenor har sagt til oss at sjølv om dei har eit robust anlegg så må vi ha forståing for at det kan oppstå feil, seier Øye-Mork. Ho forstår at feil kan skje, men ikkje at rettinga kan ta så lang tid.

Lei seg for brotet

Anders Krokan

Informasjonssjef Anders Krokan i Telenor er lei seg for at Øye føler seg nedprioritert. – Slik skal det ikkje vere, seier Krokan.

Foto: Pressebilde

Informasjonssjef Anders Krokan i Telenor seier at dei lyttar til reaksjonane frå Øye, og seier seg lei for at telenettet har vore ustabilt dei siste vekene. Han er klar på at god kundeservice er viktig for dei.

– Slik skal det ikkje vere, vi ønskjer ikkje å behandle folk ulikt. Vi er lei oss for at folk syns at dei ikkje har blitt høyrde, seier informasjonssjefen. Han opplyser at dei fleste kundereaksjonane frå Øye kom søndag.

– Vi er lei oss for at dette har skjedd, og vi vil beklage til dei som har vore råka av feilen. Så fort vi var klar over feilen så ønska vi å rette den, vi er i alle fall glade for at sambandet er oppe igjen no, seier Krokan.

Dei som har arbeidd i området har bekrefta at linjene kan ha vore ustabile dei siste vekene. Telenor fekk alarm på ein stasjon 17. mai, og montørane var på plass allereie dagen etterpå for å utbetre linjefeilen. Søndag ettermiddag var feilen utbetra.

Løysinga på problemet

Telenor skal ha oppfordra innbyggjarane på Øye til å bruke andre teleselskap, men dei var også nede fordi deira dekning skal ha vore avhengig av at Telenor var oppe.

– Telenor sa til oss at vi skulle ta sim-kortet ut av telefonane våre og starte telefonen på nytt før vi ringde naudnummera. For det første så har ein mest sannsynleg ikkje hovud til å gjere dette viss ein er i ein naudsituasjon, og for det andre så fungerte ikkje dette, seier direktøren.

– Enorme bunkar med faktura

Brot på telenettet har også hatt konsekvensar for hotelldrifta. Øye-Mork har brukt sosiale medium for å opplyse potensielle gjestar om at dei ikkje kan nåast på telefon.

– Det er ikkje ei optimal løysing, men vi må bruke det vi har. Betalinga har vore ein vits nesten. Vi har no enorme bunkar med faktura som må sendast ut til dei som har budd her.

– Ei betaling som kunne tatt 30 sekund på ein bankterminal vil no ta mykje lenger tid for både oss og gestane. Det er ei betydeleg auke i arbeid.