– Det er eit stort prosjekt på tre milliardar kroner som kan setjast raskt i gang. Dersom nokon tek initiativ og handlar, kan denne saka bli behandla i Stortinget i løpet av året.
Det sa Oddbjørn Vatne frå Senterpartiet då fylkesutvalet i dag vedtok å starte tiltaka for å sikre seg grunnområde til Nordøyvegen.
- Les også:
Stort behov for arbeid
Ambisjonen er anleggsstart på Nordøyvegen hausten om eitt år. Då er det få andre store prosjekt som er under planlegging, meiner Vatne.
– Tresfjordbrua opnar no 24. oktober, og så har vi Fv. 60 Røyr-Hellesylt som skal vere ferdigstilt neste år. Etter det er det få planlagte anleggsprosjekt i Møre og Romsdal, seier Vatne.
Han meiner at ferdigstillinga av desse prosjekta vil føre til eit behov for meir arbeid i fylket.
– Bransjen tek kontakt med meg som leiar i samferdselsutvalet og spør om og når det kjem nye prosjekt. Anleggssektoren treng arbeid, og ein mangel på nye prosjekt vil kunne føre til ei arbeidsløyse i denne bransjen, seier Vatne.
- Les også:
KS2-rapporten er avgjerande
Tysdag kjem KS2-rapporten som avgjer om Nordøyvegen-prosjektet er realistisk, og som kvalitetssikrar kostnader og tekniske løysingar på gigantprosjektet.
Det som står i rapporten vil vere ein avgjerande milepæl for om Nordøyvegen skal byggast eller ikkje.
– Realiseringa av Nordøyvegen er sjølvsagt avhengig av det som står i rapporten. Eg håpar det ikkje kjem dei store negative overraskingane i morgon, og at prosjektet let seg gjennomføre, seier Vatne.