Styret i Framstegspartiet i Møre og Romsdal er sterkt imot at det skal bli giftdeponi i fjell eller fjord. Det er planane om stranddeponi i Ellingsøyfjorden og giftdeponi på Rausand i Nesset dei reagerer på.
Sylvi Listhaug, førstekandidat til Stortinget for Møre og Romsdal, er i helga på landsmøtet i Framstegspartiet. Ho seier at Møre og Romsdal ikkje skal vere ein dumpingplass:
– Slike deponi kan føre til skade på fiskeriet i fylket og svekke omdømet til sjømatnæringa.
Sylvi Listhaug meiner Møre og Romsdal er eit utstillingsvindauge innanfor fiskeri og havbruk.
– Vi kan ikkje la slike deponi øydelegge naturmangfaldet og dei flotte fjordane som er ei viktig merkevare for fylket, seier ho.