Nils-Fredrik Drabløs (Foto: Scanpix)
– Feil rutetider
Selskapet har bomma både på marknadsføringa og rutetidene. Morgonfly klokka sju er for tidleg for dei som bur ute på bygdene og har lang køyretid til flyplassen, meiner Drabløs.
– Dersom Norwegian hadde hatt litt seinare avgang så ville folk unngått å stå opp i fem-tida om morgonen for å rekke det 7-flyet, seier Drabløs.
Han trur selskapet ville klart å fylle eit seinare fly med folk frå bygdene rundt Ålesund.
Flyg for millionar
Møbelprodusenten Ekornes i Sykkylven kjøper flyreiser for 4 millionar kroner i året. Dei har prøvd å satse på Norwegian-billettar. Men rutetidene har gjort det umogleg, og det har også vore vanskeleg å kombinere om ein skulle flyge vidare til utlandet.
– Slapt marknadsarbeid
Så Norwegian har seg sjølv å takke for at dei no må stoppe flya til og frå Vigra, meiner Nils Fredrik Drabløs. Selskapet har heller ikkje gjort nokon salsinnsats, og har ikkje vendt seg til Ekornes for å få konsernet til å bruke dei eller gjere ein avtale med dei, seier han.
– Det er litt slapt marknadsarbeid. Kundane kjem ikkje til deg av seg sjølv, du må finne deg i å bruke ressursar på å skaffe deg marknad, seier Drabløs.
Selskapet burde først og fremst ha tilpasse rutetidene slik at det blei lettare å bruke dei, meiner Ekornes-direktøren.
– Slik at dei blir valt i staden for å bli valt bort, slik dei har vore no, seier Nils-Fredrik Drabløs.
