Dei er konkurrentar på fotballbanen, eller rettar sagt på sidelinja, men er gode kameratar utanfor.
Tysdag vart dei to gulltrenarane gjort stas på av generalsponsoren til klubbane, Sparebanken Møre. Etter at Molde hadde slått Aalesund 2–1 på stadion i Ålesund.
LES ÒG:
Dei to kjenner godt styrkane til kvarandre, og då dei vart spurte om kva som kjenneteiknar den andre nølte dei ikkje med å svare.
– Som eit rovdyr
– Han kan lure folk, altså i positiv forstand, seier Aafk-trenar Kjetil Rekdal om Ole Gunnar Solskjær. Og legg til.
– Han er som eit rovdyr som kastar seg over byttet. Sånn var han då han spelte og sånn er han som trenar òg, trur eg.
Rekdal fortel at sjølv om Solskjær ser snill og bedageleg ut frå utsida, set han innetter knallharde krav.
– I motsetnad til andre som brøler framfor mikrofonen, seier Rekdal og kikkar ned på mikrofonen framfor seg.
– Sjå på han då, ser han ut som eit rovdyr?
Rekdal ser bort på trenarkollega Solskjær og gliser.
– Eg kjenner han så godt at eg veit det: Men det er i positiv forstand sjølvsagt, han er veldig dyktig, understrekar Rekdal.
– Meir direkte enn meg
Når Molde-manager Ole Gunnar Solskjær skal skildra Rekdal er det skilnadene mellom dei som først kjem fram.
– Han er i alle fall meir direkte og rett fram enn meg, seier Solskjær. Og legg til at Rekdal er ein vinnartype.
For å understreka det dreg Solskjær fram ei historie om at då cupspelarane på Molde i 1994 vart beden om å skrive opp sine positive og negative eigenskapar, skreiv Rekdal opp «vinnar», medan han sette ein stor strek under negative eigenskapar.
– Det hadde han ikkje, seier Solskjær med eit smil om munnen.
– Han er ein unik person, synst eg.
LES ÒG:
Røper ikkje taktikken til kvarandre
Rekdal og Solskjær ringer ofte og snakkar med kvarandre. Då vert det ofte snakka om fotball, fortel dei to.
– Me diskuterer landslag, europeisk fotball, resultat i det siste og kva lag me skal møte og litt slik småting. Men hemmelegheiter frå min camp det får han aldri, og det får eg aldri av han heller, seier Solskjær medan han ser lurt bort på Rekdal.
– Prøver de å lure noko ut av kvarandre?
– Uansett kva eg prøver så er han for lur til å gi med noko inside, seier Solskjær.