Det er ikkje lett å skaffe buss-sjåførar lenger. Det har Fjord1 Buss Møre fått erfare.
Då dei søkte etter fleire folk, var det ikkje éin einaste av søkjarane som var kvalifisert. I bunken var det stort sett polakkar utan norskkunnskap.
– Det har vi ikkje opplevd nokon gong. No ser vi eigentleg mørkt på framtida, seier avdelingsleiar i Fjord1 Buss Møre, Jan Arild Aarseth.
60.000 kroner for lappen
Han meiner at det er eit nytt EU-direktiv som har skulda for at ingen har lyst til å bli bussjåfør.
Direktivet krev at alle nye buss-sjåførar tek eit 140-timars kurs i tillegg til sertifikatet. Til saman kostar dette 60 000 kroner.
– Situasjonen som vi er i no er veldig uheldig. På sikt vil vi få store problem med å dekkje inn køyringa med eksisterande arbeidsstokk, fortel Aarseth.
Få går på kurs
Rogne Trafikkskule, som utdannar yrkessjåførar i Ålesundsområdet, hadde to på skulebenken på førre kurs.
Neste veke er det nytt kurs, men også no har berre to meldt seg på.
– Nedgangen i elevtalet er formidabel, og utviklinga skremmande, seier dagleg leiar Ben-Hugo Lingås.
Buss-sjåfør er ikkje fint nok
Buss-sjåfør Rune Sundby har frakta passasjerar sidan 1982. Han likar godt jobben sin, men trur ikkje buss-sjåførtittelen er fin nok for mange.
– Det har vel aldri vore statusarbeid. Det kan vere hektisk, og lønsmessig er det kanskje ikkje så tiltrekkjande for den yngre garde. I tillegg kostar det mykje å utdanne seg, seier Sundby.
For Sundby sjølv er derimot kvardagen som bussjåfør storvegs.
– Eg starta køyringa i 1982, og eg synest det er stas å køyre buss.
– Eg har alltid følt nærværet til folk. Det er eit serviceyrke der ein må meistre ulike folketypar, samt ha kontroll i trafikken. Det er ikkje sikkert det ligg for alle?, undrar Sundby.