Anlegget i Sykkylven skal ha hatt dårleg inntening over fleire år. No blir det gjennomført ei styrt avvikling, der anlegget blir lagt ned i månadsskiftet august/september.
– Dette er skuffande. Bring er eit godt selskap og det er snakk om statlege arbeidsplassar. Og det er leitt at dei ikkje klarer å halde fram drifta i bygda vår, seier ordførar i Sykkylven, Petter Lyshol til NRK.
– Vi er sårbare
– Vi har tøffe tak og det er ikkje lett å skaffe nye arbeidsplassar, seier ordføraren.
Foto: HøgreI ein arbeidsmarknad som Sykkylven, som er kjend for ein omfattande møbelindustri, er det å få 40 arbeidsledige ei stor utfordring.
– Eg vonar kvar tilsett klarer å finne seg nytt arbeid. Men vi er ei bygd med sårbar industri, vi har tøffe tak og det er ikkje lett å skaffe nye arbeidsplassar, seier ordføraren.
Dårleg lønsemd
Det er Posten som eig Bring. Bring Logistics Sunnmøre er eit eige dotterselskap under Posten.
– Selskapet i Sykkylven har hatt dårleg lønsemd over fleire år, seier Hilde Ebeltoft Skaugrud, pressesjef i Posten til NRK.
Pressesjefen seier at ho trur at også dei tilsette skjønar at Posten må gjere nokre grep.
– Vi har hatt ein god dialog med fagforeiningane undervegs. Men det er alltid leit overfor gode medarbeidarar som har stått på for selskapet i mange år, seier ho.
– Så nedlegginga har ligge i korta ei tid?
– Ja, det har nok det, seier Ebeltoft Skaugrud.
Møte med NAV
– Selskapet i Sykkylven har hatt dårleg lønsemd over fleire år, seier Hilde Ebeltoft Skaugrud, pressesjef i Posten til NRK.
Foto: Nils Midtbøen / PressefotoFrå og med neste veke vil Posten gå inn i individuelle samtalar med dei tilsette. Der vil ein sjå på om det er råd å skaffe kvar einskild arbeid i Bring. Posten vil også yte hjelp i samband med søking på nye jobbar.
– Det blir også arrangert to møte med NAV på Bring Logistics Sunnmøre, seier Ebeltoft Skaugrud.
Ordførar Petter Lyshol likte ikkje meldinga som kom i dag. No startar arbeidet med å skaffe folk arbeid.
– Men eg har forstått det slik at selskapet har slite i motbakke. Dei har gjort mange forsøk på å betre situasjonen. Og vi har fått gode forklaringar på den situasjonen som har oppstått i selskapet. Dei har hatt store tap, og dei har ikkje klart å skaffe nok inntekter, seier Lyshol.
