Det er statsadvokaten som no har tatt ut tiltale mot ein 27 år gamal mann frå Nordmøre som ved fleire høve skal ha forgripe seg seksuelt på mindreårige, i bytte mot pengar eller alkohol. Det går fram av tiltalen frå Romsdal tingrett.
Ifølgje tiltalen skal mannen mellom anna ha forgripe seg mot tre 15-åringar den same ettermiddagen hausten 2013.
Skal ha betalt med vodka og tusenlappar
Det kjem fram i tiltalen at mannen ved eitt høve skal ha betalt jentene med vodka, men hovudsakleg med pengar. Summane varierer ifølgje tiltalen med alt frå 6 til 20 000 kroner. Overgrepa skal ha skjedd ulike stader, mellom anna på eit offentleg toalett i Oslo, på eitt av kjøpesentera i Ålesund og på Atlanterhavsparken.
Totalt skal han ha forgripe seg mot sju ulike jenter i tidsrommet juli til november 2013.
Skal ha blitt hindra av politiet
Av tiltalen går det også fram at mannen skal ha avtalt å møte ei av jentene han skal ha forgripe seg mot, men at han blei forhindra sidan han sat i arrest.
Tok kontakt via Facebook
Mannen er også tiltalt etter straffeloven § 201, og skal etter tiltalen ha utvist krenkande eller uanstendig åtferd ovanfor barn under 16 år.
Ved fleire høve skal mannen ha kontakta ulike jenter via Facebook for å spørje om dei kunne tenke seg å utføre seksuelle tenester i bytte mot pengar.
Dette gjeld både nokre av dei jentene han er tiltalt for seksuelt overgrep mot, og andre. Totalt skal mannen ha vore i kontakt med seks ulike jenter i tidsrommet august til september 2013.
Det er enno ikkje klart når saka kjem opp i Romsdal tingrett.
