Bakgrunnen for det midlertidige stoppet er ei rekkje klager som har kome inn i samband med nedleggingsplanane.
- Les også:
Ville halvere talet på 110-sentralar
Det var 3. januar i år at Direktoratet for samfunnssikkerheit og beredskap (DSB) la fram planane om «Robuste 110-sentralar».
I lys av terroren 22. juli 2011 ville DSP styrke 110-sentralane ved å skape større og meir sentraliserte sentralar.
Av i alt 20 sentralar, for brann og redning i Noreg, ville DSB legge ned ni av dei for å få 11 til saman.
Skissa frå DSB la opp til ei redusering på 45 prosent.
I Nord-Noreg blei Bodø og Tromsø føreslått som dei einaste to sentralane, medan Trondheim var tenkt som einaste sentral i heile Midt-Noreg. Bergen og Stavanger skulle bli dei einaste sentralane på Vestlandet.
På Austlandet såg DSB føre seg sentralar i Moss, Elverum, Lillestrøm, Drammen, Asker og Oslo.
110-sentralane i Ålesund, Florø, Namsos, Mo i Rana, Narvik, Hammerfest, Lillerhammer, Gjøvik, Haugesund , Skien og Sandnes blei føreslått nedlagt. Planen var sentralisere nokre stadar og nyoprette andre stadar i Noreg.
- Les også:
Klage frå Telemark
No er altså prosessen lagt på is inntil vidare.
Bakgrunnen for islegginga er ei klage frå 110-sentralen i Telemark, datert 11. mars 2013, samt ei klage frå Skien brannkropsforeining frå 13. mars.
Dei protesterte kraftig mot å skulle bli nedlagt og knytte inn mot 110-sentralen i Arendal i Aust-Agder.
Fredag ettermiddag har Justis- og beredskapsdepartementet lagt nedleggingsprosessen på is.
«Det er etter departementet sitt syn behov for ytterlegare informasjon og analyser knytt til robustheit og økonomiske konsekvensar av reindyrka fagsentralar. (...) Analysen bør blant anna gi oversikt over dagens bemanning og oppgåveportefølje ved den enkelte 110-sentral og dei samfunnsøkonomiske konsekvensane av forslaget om færre og større 110-sentralar.», seier avdelingsdirektør Andreas Agersborg og seniorrådgjevar Arild Holmsen i departementet.
No ber Justis- og beredskapsdepartementet om at DSB legg fram ein prosessplan for korleis etterspurt informasjon skal innhentast og utarbeidast.
Inntil det har skjedd blir DSB bedt om å stoppe nedleggingsprosessen av ni 110-sentralar.
Saka held fram under bildet.
Stortingspolitikar Jenny Klinge (Sp), kommunal- og regionalminister Liv Signe Navarsete (Sp), og Vestnes-ordførar Geir Inge Lien (Sp) har vore uttalte motstandarar av 110-nedlegging. Her jublar dei på Senterparti-landsmøtet på Loen i Sogn og Fjordane.
Foto: Trond Vestre / NRK– Ikkje grunnlag i 22. juli-kommisjonen
Reaksjonane, frå både brannsjefar og politikarar, er jublande.
– Eg synest dette er ei fornuftig og klok avgjersle av Justisdepartementet. Dette var for dårleg fundert, og det var svært stor motstand mot å endre ein fungerande struktur.
Det seier kommunal- og regionalminister Liv Signe Navarsete (Sp) til NRK.
- Les også:
No forventar ho ein heilt annan prosess, der grunnlaget må vere eit heilt anna.
– Ein må sjå på reelle behov, og ikkje på grunnlag av 22. juli-kommisjonen. For dei gir ikkje grunnlag for å gjere endringar som det har vore lagt opp til her, meiner Navarsete.
For motstanden har vore stor, både frå 110-tilsette, kommunar, fylkeskommunar og stortingsrepresentantar frå dei ulike fylka.
– Det har vore brei mobilisering mot dette forslaget. Det viser kor viktig 110-sentralane er for folk og næringsliv i dei ulike fylka.
Brannsjef i Ålesund, Geir Thorsen (t.h.) og Torfinn Vingen møtte Liv Signe Navarsete i Ålesund. 110-sentralen i Ålesund har blitt føreslått slått saman til éin sentral i Midt-Noreg, lokalisert i Trondheim.
Foto: Olaug Bjørneset / NRKLukkeleg brannsjef
Brannsjef i Ålesund, Geir Thorsen, har levd med nedlegginsplanar i tre månader no. Midlertidig stopp i prosessen er eit stort steg i rett retning, meiner han.
– Eg er svært glad for at 110-prosessen no er lagt på is. Departementet har innsett at dei har gått for fort fram i svingane, og at saka ikkje har vore godt nok utgreidd.
Ålesund blei føreslått lokalisert under Midt-Noreg, der éin sentral i Trondheim skulle bli einaste sentral.
– For vår del er det særleg viktig å halde på 110-sentralen. Det er eit vanskeleg fylke geografisk, meiner han.
– Skrekkeksempel
Branntenesta sin Yrkesorganisasjon (BTY) er svært tilfredse med at regjeringa no tek ansvar og stoppar 110-prosessen.
– BTY har heilt sidan varsel om vedtak låg føre vore sterkt kritiske til korleis DSB har handtert denne saka., seier Trond Busterud, leiar i BTY.
– Etter vårt skjønn framstår saksbehandlinga som eit skrekkeksempel på mangelfull prosess og dårleg forvaltningsskikk frå offentlege myndigheiter.
Busterud seier DSB-avgjersla i januar kom «som lyn frå klår himmel» på heile brannmiljøet i Noreg.
– Vedtaket har sett ut som hastverksarbeid, vilkårleg og svært lite gjennomtenkt. Derfor er vi no svært fornøgde med at heile 110-prosessen kanskje får behandlinga ei slik viktig sak fortener, avsluttar Busterud.
