Ifølgje Kongshaug bør regjeringa stille langt strengare miljøkrav når nye ferjesamband blir lyst ut på anbod. I dag er det krav om gass som drivstoff på berre fem av rundt 100 ferjesamband her i landet. Til saman er det snakk om 12 ferjer.
- Det er nærast ein skandale at regjeringa er så på defensiven og brukar gårsdagens teknologi, seier Kongshaug.
Miljøgevinst
Ved å bruke gass som drivstoff i staden for diesel vert utsleppa av klimagassar redusert, men når regjeringa lyser ut anbod på ferjestrekningane er det berre eit fåtall der det blir stilt krav om at det skal vere gass som drivstoff på sambanda.
Dette fører til at ferjeselskapa veljer tradisjonell diesel når det ikkje blir stilt andre krav.
- Ja, ei gassferje er om lag 20 prosent dyrare å bygge. Når det blir lyst ut anbod er det som oftast lågaste pris som gjeld og vi veljer då diesel, seier Anker Grøvdal, administrerande direktør i Fjord 1 MRF.
Vil ha meir gass
Statssekretær Erik Lahnstein (Sp) i Samferdselsdepartementet tek ikkje kritikken innover seg, men vedgår at det bør brukast gass i fleire ferjesamband.
- Det er ein større kostnad med dette, noko vi må vege opp mot klimagevinsten, seier Lahnstein.
Større ferjer - større utslepp
Men sjølv om ferjene går på gass treng ikkje det føre til auka miljøgevinst. Større ferjer som går raskare et opp mykje av miljøgvinsten, seier leiar i Naturvernforbundet, Lars Haltbrekken.
- Regjeringa burde stille krav om totale utslepp av klimagassar når dei lyser ut anbod. Dette vil presse fram dei mest miljøvenlege løysingane, seier Haltbrekken.
Press frå brukarane
Men meir saktegåande ferjer vert truleg heller ikkje realiteten ved sittande regjering.
- Folk vil ha ferjer som går raskt, noko vi merkar både frå privatpersonar og næringsliv, så her må vi vege miljøet opp mot samfunnsinteressene, seier Lahnstein.