- Vaksne må bry seg

Mange vaksne har ikkje skjønt alvoret i mobbinga som går føre seg i fleire nettsamfunn, meiner ungdommane.

Blåaugde

- Mange vaksne trur at mykje av det som går føre seg berre er uskuldig moro. Men det er det ikkje, seier Kong Man Lau. Han er elev ved Skarbøvik ungdomsskule. I nettsamfunn kan du oppleve rasisme, seksuell trakassering, mobbing av korleis du ser ut og kva stil du har, seier han.

Vaksne fråverande

- Den dag i dag finn du masse vaksne som ikkje har peiling på kva som går føre seg på internett, seier medelev Angelika Louise Hegerland Kejzar. Det er veldig få av dei som veit kva ungommane gjer på internett. Det er ikkje så mange av dei som veit korleis dei loggar seg inn på Facebook eingong, seier ho. Det ville sikkert ha blitt mindre mobberisiko dersom det også var vaksne innom nettsamfunnet, legg ho til.

Feigt

Ho kritiserer kraftig medelevar som brukar internett til å mobbe andre. - Det er ekstremt feigt å gøyme seg bak ein PC-skjerm og skrive slibrige kommentarar om ein annan person. På PC-en tør mange å skrive det dei ikkje tør seie ansikt til ansikt, seier ho. I går kom det fram at politiet meiner nettmobbing kan føre til sjølvmord.

Respekt

- Mange barn og unge tør kanskje skrive meir når dei trur at vaksne ikkje les dette. Dei ville sikkert ha vist meir respekt dersom vaksne var meir med i nettsamfunna, seier medelev ved Skarbøvik ungdomsskole Anders Wiig.

Netteigarane har ansvar

Angelika Louise Hegerland Kejzar meiner at eigarane av dei forskjellige nettstadene har eit ansvar. Ho har også eit konkret forslag til korleis eigarane kunne gjere nettstadene meir trygge. - Dei bør ha skikkelege varselsknappar på sidene. Dersom du opplever mobbing kan du då med ein gong trykke på knappen, og eit skjermbilde av det som skjer på PC-en blir sendt til dei som driv nettstaden. Slik kan eigarane få sjå kva som går føre seg der og då, seier ho.