Ole Gunnar Solskjær framstår no som ein heit kandidat som ny trenar for Molde fotballklubb. Direktør Tarje Nordstrand Jakobsen stadfestar at dei kjem til å ha samtalar med Solskjær.
Molde-direktør Tarje Nordstrand Jakobsen stadfester at dei vil ha samtalar med Solskjær.
Foto: Arne Flatin / NRK– Det vi har kommunisert er at Molde fotballkubb oppfattar Ole Gunnar Solskjær som «inviterande» i eit intervju han har gitt. Då er det naturleg at vi tek kontakt og spør om vi kan ta ein prat, seier Molde-direktør Tarje Nordstrand Jakobsen.
– Spekulasjonar
Tarje Nordstrand Jakobsen karakteriserer dagens oppslag om Ole Gunnar Solskjær som spekulasjonar. Han vil ikkje seie noko om Solskjær toppar ei ønskjeliste eller ikkje.
– Vi kjem til å annonsere resultatet av prosessen når arbeidet med å tilsetje ny trenar er ferdig. Før den tid kjem vi ikkje til å stadfeste eller avkrefte noko som helst. Vi seier ikkje noko om kandidatar, ei eventuell rangering av kandidatar eller noko i den retning før resultatet er klart, seier Jakobsen.
Mange meiner å vite
VG skreiv sist veke at Molde-sponsor Kjell Inge Røkke ønskjer at Solskjær skal få jobben som trenar. No skriv avisa at Molde alt har starta samtalane med Solskjær.
– Det er vel gjerne slik at mange ser for seg og ønskjer at lokale trenar-størrelsar skal vere aktuelle. Det er ikkje unaturleg. Styra i Molde fotballklubb og Molde fotball AS er sjølvsagt involverte i prosessen. Dette er på same måte som dei er involverte i andre sentrale tilsetjingsprosessar, seier Jakobsen.