Nyttårsaftan – utan kalkun

– For meg har alltid nyttårsmiddagane variert, og det har aldri vore snakk om å berre ha kalkun. I barndommen laga pappa trerettars måltid med alt frå ribbe til heilbakt laks som hovudrett, fortel meisterkokken Geir Skeie frå Fitjar.

Nå feirar han nyttår saman med venar som også er kokkar, og det er absolutt maten som står i sentrum på festkvelden.

– Me lagar masse ulike rettar saman, og ofte kjem me ikkje til desserten før etter klokka tolv, fortel han.

Han er spesielt glad i sjømat på denne årstida, noko som pregar nyttårstipset hans.

• For dei som skal ha kalkun på nyttår: Dette er Lise Finckenhagens beste kalkuntips

Geir Skeie – nyttårsmat frå sjøen:

• Forrett: Gratinert hummar (servert med sjampanje)
• Hovudrett: Steikt villkveite med linser, bakte rotgrønsaker og raudvinssaus (servert med ein lett raudvin)
• Dessert: Sjokolademousse med sylta kirsebær

– Sjømat passar godt på nyttår, sidan ein har vore gjennom ei tid med mykje feit julemat. Eg er veldig glad i hummar, anten gratinert eller i hummarsuppe. Du får tak i svært god villkveite i dei fleste fiskediskar på denne tida, derfor blir dette hovudretten. Til dessert er eg svært glad i sjokolade, så då må det anten bli ei varm sjokoladekake, sjokoladefondant eller sjokolademousse. Saman med sylta kirsebær, forklarar Geir Skeie.

Hans Dahl Ørstavik – enkelt å laga:

Kokkelærar på Bryne Vidaregåande skule, Hans Dahl Ørstavik, har gjennom hausten vist oss korleis me enkelt kan laga ymse rettar i ein videoserie på NRK Mat.

Til nyttår føreslår han ein rett som er svært enkel å lukkast med, også om du skal laga den til mange.

• Forrett: Gravlaks med dillstua poteter og sennepssaus (servert med ein tørr Riesling)
• Hovudrett: Langtidsbakt svinenakke med bakte rotgrønsaker og sjy (servert med raudvinen Doppio Passo)
• Dessert: Jærsk fløytepudding (servert med ein søt Riesling eller dessertvin)

I videoen nedanfor kan du sjå korleis ein går fram for å laga hovudretten i Ørstavik sin nyttårsmeny.

• Fleire oppskrifter frå Hans Dahl Ørstavik

Kjartan Skjelde – lett og tung:

– For meg er det ikkje så viktig å eta kalkun på nyttår. Men nyttår er ein festdag så det er viktig at ein et god festmat, seier ein av landets mest meritterte kokkar, Kjartan Skjelde.

Han har komponert ein meny som både inneheld lett og litt tyngre mat. Sjølv om han berre skal plukka ut tre rettar, ønsker han å snika inn røykt andebryst som ein mellomrett etter forretten.

– Det er sesong for kamskjel og dei blir aldri så gode som nå, i tillegg passar det godt med litt tyngre rettar som ytrefilet i denne årstida, seier han om menyen sin.

• Forrett: Råmarinert kamskjel, sylta eple, brødkrutongar og ørretrogn (servert med sjampanje)
• Hovudrett: Ytrefilet av okse (servert med Barbaresco-raudvin)
• Dessert: Pæremuffins med ostekrem og fløtekaramellsaus (servert med kvitvin frå drua Gewurztraminer)

Her kan du sjå korleis Kjartan Skjelde lagar desserten i menyen sin.

• Fleire oppskrifter frå Kjartan Skjelde

Bent Stiansen – gourmetmenyen:

• Forrett: Ristede kamskjel med sellerikrem, marinert sopp og basilikumvinaigrette
• Hovudrett: Oksefilet Wellington
• Dessert: Frukter og bær i appelsinsaus med vaniljemousse

Dette er nok ein meny for folk som har litt erfaring på kjøkkenet, men sjølv skal meisterkokken Bent Stiansen legga lista endå høgare når han sjølv inviterer til den store festdagen.

– Eg liker best å laga ulike gourmetrettar på nyttår. I år skal eg ta imot gjestar i det nye huset mitt i Odense i Danmark, her skal eg laga alle rettane frå Karen Blixens novelle om Babettes Gjestebud frå 1950, fortel meisterkokken Stiansen.

Dette er ei novelle som handlar om eit utruleg måltid i Berlevåg, og filmen som blei laga basert på novella fekk Oscar i 1988.

– For gourmetelskarar er dette ein fantastisk film, og eg vil gjenskapa menyen, fortel han.

Det vil sei at han skal servera skjelpaddesuppe, Blinis Demidoff med kaviar, vaktlar i sarkofag med foie gras og trøffelsaus, ostar frå Auvergne og formkake med rom og frisk glasert fruktsalat.

• Fleire oppskrifter frå Bent Stiansen

Stig Juelsen – champagnesuppe(!):

Kokken Stig Juelsen er på lik linje med Geir Skeie glad i hummar og fisk på nyttårsaftan. Juelsen føreslår torskerygg som hovudrett og hummar som forrett.

• Forrett: Hummar med hvitløksagurk og estragonsmør
• Hovudrett: Torskerygg med rekesaus og parmaskinke
• Dessert: Jordbærsuppe med sjokoladepannacotta

Dette er ein meny som Juelsen opphavleg sette opp for NRK Mat i 2005, men som han framleis står inne for.

• Fleire oppskrifter frå Stig Juelsen