Vi oppsøkte butikkane som vanlege kundar for å sjekke kva service vi fekk. Ingen tvil om at butikkane har forbetringspotensiale.
På møbelgiganten Skeidar på Alnabru i Oslo spaserte vi rundt i lokalet i over 15 minutt, utan at nokon av dei tilsette kontakta oss. På det tidspunktet var det svært få kundar i lokalet. Betjeninga stod i skranken og prata ilag.
– Dette er ikkje slik det skal vere, seier driftssjef Åse Almvang i Skeidar.
Utseld
Tilslutt var det vi som måtte be om hjelp. Det var berre eit problem. Den svarte sofaen dei reklamerte for i reklamebrosjyren hadde dei ikkje på lager. Først i januar kunne vi få den levert.
– Dette er ein uheldig situasjon og ikkje normal leveringstid på våre møblar. Sofaen du ville kjøpe har vore veldig populær og det er nok grunnen til at den er blitt utseld, forklarar Almvang. Ho hevdar at normal leveringtid er åtte veker. På same tid lover ho at i neste annonsefolder skal det bli opplyst om kva sofaer som ikkje kan leverast før jul.
Trist
Mange kjeder fløymer over oss med store reklamekampanjar med billege varer. Hjå Lefdal prøvde vi å kjøpe ei slik billeg vaskemaskin. I annonsen vart den omtalt som kraftig. Men då vi prøvde kjøpe den kunne seljaren fortelje oss at den maskina hadde dei ikkje på lager før om fleire veker.
Vi vart synt til ei annan maskin. Problemet var berre at den var langt dyrare. I tillegg fekk vi beskjed om at vaskemaskina ikkje ville holde mål for ein vanleg familie. Truleg ville den ikkje ville vare stort lengre enn i 4 år. Også hjå Lefdal var det lang ventetid og ingen som fysisk oppsøkte oss.
– Eg blir trist og veldig lei meg når eg høyrer den kundebehandlinga du har fått på vår butikk, seier administrerande direktør i Lefdal, Trond Samuelsen. Han seier dei drillar sine tilsette på at kundane skal bli lagt merke til når dei kjem inn i butikken.
Tøff konkurranse
Hjå Cubus var det heller ingen betjening som oppsøkte oss. Det var berre ei som jobba i herreavdelinga, men det vart lang ventetid på å få hjelp. Heller ikkje kunnskapsnivået var til å skryte av. Personalet kunne ikkje svare på kva stoff jakka inneheldt og om den tålte fukt.
– Cubus er ei kommersiell motekjede som tilbyr kleder til ein rimeleg pris. Vi jobbar kontinuerlig med kundebehandling og service, og vi mottek totalt sett lite klager frå kundar.
– For å halde prisane konkurransedyktige klarar vi dessverre ikkje å ha like høg bemanning som dei dyrare kjedene. Slik forklarar Trude Martinsen Brun, informasjonsansvarleg i Cubus, servicen vi fekk.
Overletne
Konkurrenten KappAhl hadde heller ikkje så mykje å slå i bordet med, når det gjeld å oppsøke oss som kundar. Under vårt besøk var vi dei einaste kundane, likevel vart vi ikkje tilbydd hjelp av betjeninga.
Først når vi bad om hjelp fekk vi kontakt, men den tilsette tok seg ikkje tid med oss. I staden overlèt ho oss aleine i butikken, medan ho fortsette med sitt ryddearbeid.
– Dette er ikkje måten kundane skal bli møtt på og det er berre å beklage, seier Liv Berstad som er administrerande direktør i KappAhl Norge.
