Slit du med snorking? Finn n-punktet!

Er du plaga med snorking eller søvnapné, kan det hjelpe å trene tunga og musklane i ansiktet, viser studiar frå USA. Ein norsk søvnforskar trur metoden kan hjelpe mange her i landet.

Tungespissen bør kvile på n-punktet, altså staden den legg seg når du uttaler bokstaven n. Bildet er tatt nedanfrå og viser innsida av ganen, den øvre tanngarden og delar av nasen til ein mann.

HER BØR TUNGESPISSEN KVILE: N-punktet ligg rett bak fortennene i den øvre tanngarden, her markert med ein svart ring.

Foto: Malin Staaf / Privat

– Snorkinga blei verre når ho var forkjøla. Og plutseleg kunne ho kome med eit kort gisp etter luft, seier Vibecke Lid om dottera Ariela på 11 år.

Jenta var plaga med kraftig snorking og pustestopp under søvn, men ikkje nok til å få medisinsk hjelp. Etter å ha trena tunga og ansiktsmusklane i nokre månader, søv ho ifølge mora mykje rolegare.

Vibecke og Ariela Lid

SØV BETRE ETTER ANSIKTSTRENING: Vibecke og Ariela Lid oppsøkte hjelp for Arielas søvnproblem.

Foto: Privat

Spesialiserte seg på tungetrening

Dei søkte hjelp hos terapeut Malin Staaf. Ho er ein av få i Noreg som har spesialisert seg på trening av tunge- og ansiktsmuskulatur som behandling for blant anna snorking og søvnapné.

Metoden er prøvd ut av forskarar tilknytt Stanford-universitetet i USA over fleire tiår. I fjor blei den ettergått av spanske forskarar.

Kort fortalt går den ut på å stramme opp musklane i svelget, så det ikkje klappar saman under søvn og gir snorking.

– Finn n-punktet

Staaf gir pasientane øvingar ut ifrå kva problem dei har.

For nokre kan overvekt legge svelget under press. Å ha liten underkjeve eller smal gane kan gjere luftvegane trongare. Men alle kan få hjelp, meiner Staaf.

Etter nokre månaders trening skal pasientane helst ha lagt seg til fire vanar:

  • Pust berre med nasen, alltid med munnen lukka.
  • La tunga kvile oppe i ganen.
  • La tungespissen kvile på n-punktet. Det er staden denne legg seg når du uttaler bokstaven n.
  • Svelg riktig. Tunga skal aldri vere borti framtennene når du svelger.

For å få til dette, skal pasientane gjere ulike øvingar i 3-5 minutt morgon og kveld.

Kvinne ligg på grå madrass

TREN BORT SNORKING: Får du tunga til å fungere riktig, kan du bli kvitt snorkinga, viser amerikansk forsking.

Illustrasjon: Ingunn Rauk / NRK

– Ved å styrke muskulatur og funksjon i tunga, kan du unngå at ho sig bakover og hindrar pusten mens du søv, fortel Staaf.

Ho understrekar at treninga er eit tillegg til og ikkje ei erstatning for behandling av snorking og søvnapné.

Snorking med pustestopp kan vere farleg

Snorking er ikkje farleg. Men det kan vere vanskeleg å skilje frå sjukdommen søvnapné.

Denne gjer at ein fleire gonger i løpet av ei natt sluttar å puste i meir enn ti sekund. Pasienten blir trøytt og sliten, og kan få høgt blodtrykk.

Mellom 8 og 16 prosent av oss har søvnapné som krev behandling.

Oftast får pasienten ein CPAP-maskin. Den held oppe luftvegane ved å blåse høgtrykksluft gjennom ei maske over nasen og munnen. Men mange synest den er vrien å sove med.

CPAP-behandling

MASKINELL BEHANDLING: Det går nok greitt for dokkene, men ekte menneske kan slite med å slappe av med CPAP-maske over ansiktet.

Foto: Kathrine Krømke

Vil gi fleire tilbod om snorkebehandling

Søvnforskar Harald Hrubos-Strøm har tru på munn- og ansiktstrening som del av behandlinga. Han er overlege ved øyre-nase-halsavdelinga ved Akershus universitetssjukehus.

No vil han saman med andre forskarar undersøke metoden. Dei vil sjå om dei finn same effekt som i andre studiar.

– Då har munn- og ansiktstrening potensial til å bli ei viktig behandling for motiverte pasientar med søvnapné, meiner Hrubos-Strøm.

TV og radio

Tonnevis av søtsaker går rett i søpla fordi det er billigere å kaste enn å gi bort. Knut Arild Hareide og kona Lisa Maria bestemmer seg for å gjøre noe med dette.
Helene sjekker inn - på asylmottak. Norsk dokumentar.
I fem døgn bor programleder Helene Sandvig sammen med asylsøkere på Dikemark Asylmottak. Det blir et tøft møte med en helt annen virkelighet.
Aida sov et helt døgn og Halvor får ikke sove uten å gjøre et spesielt triks. Hva feiler det dem? Tre butikkansatte med nettbrett utfordrer legelaget i kveldens episode. Programleder: Kjetil Røthing Askeland. Sesong 2 (4:8)