Nordmenn mest glade i jobben sin

43 prosent av norske arbeidstakarar seier dei er «veldig fornøgde» med jobben.

Det er best av 29 land i Europa som har vore med i ei undersøking gjort av rekrutteringssystemet Randstad. Berre Sveits er på nivå med Noreg.

37 prosent seier dei er «fornøgde» med jobben. Dermed seier åtte av ti spurde i Noreg at dei er glade i jobben sin, skriv Teknisk Ukeblad.

Fornøgd folkeslag

Førsteamanuensis Ole Johnny Olsen ved Sosiologisk institutt ved Universitetet i Bergen meiner det er fleire ting som gjer at nordmenn er fornøgde med jobben sin.

– Eg vil tru at det har noko med økonomisk godtgjering å gjere. Det er også ganske stor grad av likskap mellom arbeidstakarar i Noreg. Eg vil tru arbeidstakarar meiner det er viktig å ha ulike arbeidsoppgåver, at ein i ganske stor grad kan styre arbeidsdagen sin. Det er dessutan viktig å ha ei viss grad av eigenutvikling, seier han til NRK.no

Han meiner Noreg sannsynlegvis kjem godt ut fordi vi opplever sosial tryggleik.

– Vi har eit relativt trygt arbeidsliv, og har ei fagforening å gå til om det skulle vere noko vi ikkje er fornøgde med, seier han.

• Les: Verdens beste land å bo i?

Mexico best - Japan verst

Sjølv om Noreg og Sveits kjem best ut i klassen «veldig fornøgd», er det Danmark som har størst del fornøgde arbeidstakarar.

Utanfor Europa er det i Mexico at det finst flest fornøgde arbeidstakarar. Der seier 41 prosent at dei er «veldig fornøgde» og 42 prosent at dei er «fornøgde».

– Det er vanskeleg å seie kvifor dei kjem så høgt. Det kan ha noko med referanserammene å gjere, seier Olsen og seier seg samd i at nordmenn kanskje ikkje hadde vore like godt nøgde med arbeidstilhøva i Mexico som det mexicanarane er.

Tilbake i Europa er det i Ungarn, Slovakia og i kriseråka Hellas at arbeidstakarane er minst nøgde med jobben.

I resten av verda er det Japan som kjem dårlegast ut. Berre fire prosent av arbeidstakarane i landet seier dei er «veldig fornøgde» med jobben.