Forsking peikar på at kvinner kan ha større førebyggjande og rehabiliterande effekt av trening enn menn når det gjeld hjarte-karsjukdommar. Forskinga er gjort av The European Society of Cardiology og er publisert i Oxford Journals.
Ifølgje forskinga minkar kvinner som trener sjansane sine for åreforkalking, som kan gje mellom anna brystkrampe, hjarteinfarkt og hjerneslag, i større grad enn det menn som trener, gjer det.
Ei mogleg orsak til dette kan vere østrogenhormona hjå kvinner.
– Kvinner må trene
Kardiolog ved Oslo universitetssjukehus, Sigrun Halvorsen er oppteken av å minne kvinner på kor viktig det er å trene.
Foto: FOTO: PRIVATKardiolog Sigrun Halvorsen fortel at kvinner oftare får ei litt meir diffust utbreidd åreforkalking enn menn, der det i mange tilfelle ikkje løner seg å operere eller drive utblokking.
– Sidan kvinner sjeldnare vert operert etter hjarteinfarkt vert det enda viktigare for dei å trene for å førebyggje nye infarkt, seier Halvorsen til NRK.no.
Di meir alvorlege infarktet er, di mindre er forskjellane mellom kvinner og menn.
– Middelaldrane kvinner er ofte mindre fysisk aktive enn middelaldrande menn, men fysisk aktivitet er minst like viktig for dei, seier Halvorsen.
Amerikanarane er komen lenger når det gjeld kjønnsspesifikk forsking på hjarte-karsjukdommar. Dei har mellom anna eigne retningslinjer for forebygging av hjarte-karsjukdommar hjå kvinner.
– Dei fyrste aksjonane for å auke fokuset på hjarte-karsjukdommar hjå kvinner fann stad i USA, før dei kom til Europa, fortel Halvorsen
Kvinnekampanje
Ei av tre norske kvinner døyr av hjarte-karsjukdommar, ifølgje Landsforeningen for hjerte- og lungesyke (LHL). Det gjer dette til den hyppigaste dødsårsaka blant norske kvinner. I 2011 døydde omlag 1000 fleire kvinner enn menn av hjarte-karsjukdommar.
Den siste tida har LHL sett fokus på kvinner med hjarte-karsjukdommar gjennom den årlege «Hjertelig hilsen-kampanjen».
– Det er svært viktig med kjønnsspesifikk forsking, seier Ragnhild Jacobsen, presserådgjevar i LHL.
Foto: FOTO: LHL– Tidlegare har forskinga i stor grad vore gjort av menn, på menn, seier kommunikasjonsrådgjevar i LHL Ragnhild Jacobsen til NRK.no.
Ho strekar under viktigheita av kjønnsspesifikk forsking på hjarte-karsjukdommar. Nyleg gav LHL to millionar til tre ulike forskingsprosjekt med fokus på kvinner.
– Med kvinners inntog i det offentlege liv, med kvinnelege legar og forskarar, har kvinnehelse vorte sett meir på dagsorden, seier Jacobsen.
Jacobsen legg til at det fortsatt er ein veg å gå.
- Flere kvinner enn menn dør av hjerte- og karsykdommer
- Dette kan redusere risikoen for hjertesykdommer med 32 prosent
Røyk farlegare for kvinner
Kvinner har ofte dei same symptoma som menn, men dei er ofte meir diffuse og kan forvekslast med andre ting.
Døme på symptom hjå kvinner kan vere at ein vert kortpusta, får smerter i brystet, hjartebank, rask ujamn puls, smerter i rygg, kjeve eller nakke, influensaliknande symptom, kvalme, kaldsvetting eller fordøyelsesproblem.
Menn får oftare klassiske symptom, som smerter i brystet
– Me får framleis historier frå kvinner, der legen ikkje har skjønt at dei har ein hjarte-karsjukdom, seier Jacobsen.
Ho har likevel eit inntrykk av at fokuset på desse sjukdommane hjå kvinner har auka bevisstheita hjå helsepersonell.
Rådet til både kvinner og menn er å vere merksame på risikofaktorane for hjarte-karsjukdommar, mellom anna høgt blodtrykk og kolesterolnivå. Ein bør mosjonera nokre timar i veka, ete mykje fisk, grovbrød, samt frukt og grønt. I tillegg er det viktig å halde seg unna sigarettane.
