18 prosent av unge mellom 18 og 24 år meiner det er greitt å kjøpe forbruksvarer med pengar dei ikkje har. Dette viser ei spørjeundersøking utført av kredittbyrået Intrum Justisia.
Dette er opp frå 13 prosent året før.
Ane (26) og Tora (21) har hatt kredittkort sidan dei var 18 år gamle. Begge bruker kredittkortet sitt på slutten av kvar månad når dei faste inntektene er oppbrukt, ofte på mat, øl og snus.
– Problemet er at det er altfor enkelt å dra kortet, det er så tilgjengeleg, seier Ane.
– Men vi bur i Oslo og har ikkje lyst til å takke nei til å vere med på alt heile tida, supplerer syster Tora.
Ingen god ide, meiner økonomiekspert.
– Det er ein dårleg vane å tileigne seg: Å bruke kredittkortet som ein slags buffer, seier Hallgeir Kvadsheim, siviløkonom og økonomisk rådgivar i TV-serien «Luksusfellen».
Les meir:
Klarer ikkje spare
Han fortel at unge som konstant har noko i minus, slik som Ane og Tora, kan få ubehagelege overraskingar i framtida.
– Kredittkortet kan koste deg draumejobben. Dersom ein har mykje gjeld og heile tida spring etter kredittkortet står ein plutseleg mykje mindre fri til å velje yrke, seier Kvadsheim.
Han utdjupar:
– Unge som heile tida har ei kredittkortrekning å betale har mindre fleksibilitet. Dei kan bli tvunge til å ta jobbar dei eigentleg ikkje vil ha og det kan bli vanskelegare å klatre mot draumeyrket sitt.
Dette kjenner Ane seg igjen i:
– Eg har søkt ein del andre jobbar for å kunne betale ned gjeld og sørge for at eg kan få orden på ting før eg gjer det eg eigentleg vil.
Kvadsheim fortel at unge som konstant har minus på kredittkortet også viser til banken at dei ikkje klarar å spare til å få bustadlån for eksempel.
- Les meir:
Trygg grunn
Ane måtte i fjor betale rett over 1000 kroner i renter for sitt kredittkortbruk. Ho er ikkje aleine: Heile 28 prosent av dei spurte mellom 18 og 24 har tidlegare hatt problem med å betene lån dei har tatt opp.
Men Ane og Tora er ikkje i luksusfella endå, meiner Kvadsheim. Dersom dei klarar å snu nokre av vanane sine er dei på trygg grunn.
– I byrjinga følast kredittkort veldig fritt, men i lengda gjer det oss mykje meir bundne, seier Kvadsheim.
I NRK Forbrukerinspektørene får Ane og Tora føle på konsekvensane av sin kortbruk.