Hopp til innhold

Viikon tärkkeimät uutiset

Viikko 27. Maanantaina yli yhđeksensattaa SAS:in lenttääjää menthiin lakkhoon Norjassa, Tanskassa ja Ruottissa. Britanniassa maan staatinministeri jättää hallituksen, ja Tanskassa tapahtui sunnuntaina joukkoampuminen.

Kotimaa

Maanantaina yhđeksensattaa SAS:in lenttääjää menthiin lakkhoon Norjassa, Tanskassa ja Ruottissa. Lakon syynä oon SAS:in kaksi uutta tytärfirmaa, SAS Connect ja SAS Link, jokka palkathaan uussii ja vanhoi lenttääjii uusila, huonomilla ehđoila.

Esimerkiksi noin 450 lenttääjää, jokka menetethiin työpaikansa koronapandemian takia, jouđuthaan nyt aloittamhaan uusissa tytärfirmoissa huonoimilla palkoila, ko alkupöräinen SAS-firma heile alunpärin tarjosi.

Lakko jatkuu vielä perjantaina, ja nyt jo yli 752 flyyireissuu oon jouđuttu perumhaan.

SAS-fly
Foto: Tore Ellingseter

Norjassa apinaruven määrä oon nousussa. Maan kansantervheysinstitutti FHI ilmoitti keskiviikkona, ette 22 ihmistä oon saanu jo tartunhan. Vaikka luku oon matala, oon se korkkeempi ko koskhaan ennen maassa.

Keskiviikkona kans mailman tervheysjärjestö WHO piti kriisimöötin ruven ympäri. Vaikka järjestö ei ole pöläny apinaruppee, oon se huolestunnu sen noppeesta levviimisestä.

Kaikki Norjassa 22 apinaruven saanutta oon oon 20 ja 49 vuođen ikhäissii miehii, ja seittementoista heistä oon Uslun ja Vikenin plaanalta.

Apekopper sett i mikroskop
Foto: RUSSELL RE CYNTHIA S. GOLDSMITH / Reuters

Norjan öljy- ja energiaministeri Terje Aasland varottaa, ette ensi kevhäänä met saatama jouttuut säästämhään sähköstä. Ministeri muistelee, ette jos se loppuvuođen sattaa vähempi ko normaalisti, saattaa se tarkoittaat ette sähkön käyttöö jouđuthaan rajoittamhaan ensi kevhäänä.

Rajoitukset tulis koskemhaan ainaki firmoi, mutta mahđolisesti kans tavalissii ihmissii.

Høyspentlinje og vindmøller i Høg-Jæren energipark.

Jos se ei sattaa normaalisti, jouđuma met luultavasti säästämhään sähköö ensi vuona. 

Foto: Øystein Otterdal / NRK

Kuningatar Sonja täyttää tääpänä 85-vuotta. Hän feiras päivää privaatisti feeriälä Helgelandin rannikolla.

Dronning Sonja av Norge
Foto: Jørgen Gomnæs / Det kongelige hoff

Mailma

Britannian staatinministeri Boris Johnson jättää staatinministerin ja parttiinjohtaajan virkkaansa. Niin hän ilmoitti eilen tuorestaina pressekonferenssissa.

Päätös johtuu usheemasta skandaalista, missä Johnson oon ollu osana. Niistä uusin oon tieto sen ympäri, ette staatinministeri tiesi hänen parttiinjäsenen, Christopher Pincherin, tevoista, mutta ei ollu tehny assiile mithään. Pincher oli nimittäin seksuaalisti lyngäny kahta miestä samasta parttiista.

Boris Johnson
Foto: HENRY NICHOLLS / Reuters

Sunnuntaina Tanskan pääkaupungissa Kööpenhaminassa kolme ihmistä kuoli ja usheempi loukkaantui joukkoampumisessa. Tekkiijä oon 22 vuođen ikhäinen tanskalainen mies, joka hyökkäs paikalisheen ostosentterhiin asheen kanssa.

Mies oon nyt poliisin hallussa, ja poliisi ei eppäile, ette tevon takana olis usheempi henki. Tekkiijä oli nimittäin jakanu sosiaalisessa meediassa usheeman videon ittestähän ylikirjoituksela «I don't care», mie en välitä, og «Quatiapine doesn't work», Quatiapine ei toimi. Quatiapine oon metesiini, jota käytethään muun muassa skitsofrenian hoiđossa. Mies oli kans psykiatrille tuttu henki.

Et bilde hentet fra Twitter som viser to politimenn som står i nærheten av en mann som sitter på huk, med hendene bak ryggen. Han sitter med ryggen til og ser nedover.
Foto: Dansk TV 2

Shinzo Abe, joka oli aijemin Japanin staatinministeri, ammuthiin perjantaina poliittisessa tapattumassa. 67 vuođen ikäisäksi eläny Abe oli maan staatinministeri 2006-2007, ja taas 2012-2022.

Aben tappanu mies, oon 40 vuođen ikhäinen mies, joka oon aijemin ollu sotamies.

Shinzo Abe og Erna Solberg i Japan
Foto: Kjersti Strømmen / NRK

Kans Euroopassa oon menossa flyyikriisi. Monet eurooppalaiset flyyifirmat oon joutunu perumhaan usheita flyyireissui lenttääjäpuuttheen ja lakkoin takia, ja monet isot flyyiplassit oon täytyny vihaisista matkustaajista.

Esimerkiksi Britannian suurin lentofirma, British Airway, oon ilmoittannu ettei sillä ole tarpheeksi työvoimaa. Kans Frankfrutin lentohaminala oon kaaos

Kø på flyplassen i Frankfurt Tyskland.
Foto: Michael Probst / AP

Viikon tärkkeimät uutiset viikko 39

Viikon tärkkeimät uutiset viikko 38