Mailma
Ainaki kaksikymmentäyksi tuhatta (21 000) ihmistä kuoli maanvapinassa, joka tapattui Turkin ja Syyrian plaanala sunnuntain ja maanantain välisennä yönä. Kuolleitten määrä oon nousu joka päivä, koska lissää ruumhiita löyđethään jatkuuvasti murskaatunneitten rakenusten ja pytinkhiin alta.
Maanvapina oli yksi plaanan pahemista sitte kahđekseenkymmenheen (80) vuotheen.
Tuorestaina Ukrainan presidentti Volodymyr Zelenskyj kylästeli Euroopan unionin (EU) huippumöötissä Brysselissä. Vierailu oli osa presidentin viralista Eurooppa-reisuu, jonka aikana hän oon muun muassa kohđatellu Englanin kuninkhaan Charles III:n.
Möötissä Zelenskyj kiitti Euroopan maita niitten avustuksista, mutta sannoi kans ette Ukrainala oon kova tarve militääriflyyiistä. Siksi hän esitti toivheen sen ympäri ette Euroopan maat saattais anttaat niitä maale. Moni maa, niin ko Franska ja Tyskä, oon kuitenki huolestunnu, ette flyyin antaminen vetäis maat liian suorhaan sothaan Venäjää vasthaan.
USA:n presidentti Joe Biden piti keskiviikko yönä Norjan aikkaa hänen tradittiinaalisen State of the Union -saarnan maan kongresissa. Saarnassa presidentti otti muun muassa esile rikkhaitten räntyn ja oikkeuđen abortthiin.
– Kenenkhään miljunäärin ei häytyis maksaat vähempi ränttyy ko opettaajan tahi palomiehen, sannoi Biden saarnassa.
Räntyn noston lisäksi hän meinas, ette Kongressi häyttyy ottaat takas ylheinen oikkeus abortthiin, jonka korkkeinoikkeus poisti viimi vuona.
Kiinalainen spiunipalonki, joka viimi viikola havaithiin USA:n ja Kanadan atosfäärissä, ammuthiin alas viimi pyhänä ko se lensi meren ylä. Kiinan päätösvallan jälkhiin kysheessä olis ollu tyhä karkhuun päässy kliimapalonki, mutta eilen USA:n päätösvalta ilmoitti, ette se tođela olis spiunityökalu.
Maa ilmoittaa, ette kaikki, joila oon jotaki tekemistä palongin kans, tullee saamhaan seuraamuksii.
Sunnuntaina jajethiin tämän vuođen Grammy-palkinot. Vuođen albumiksi valithiin Harry Stylen Harrys House ja vuoden lauluksi Bonnie Rattin Just Like That.
Tämän vuotinen palkintojako oli kuitenki erityisen tärkkee artisti Beyoncéle. Hänestä tuli eniten palkinttoi saanu artisti Grammyin historiikissa sen jälkhiin, kun hänen palkithiin parhaasta tanssi/elektronisesta laulusta ja parhaasta tanssi/elektronisesta musikkialbumista.
Kans norjalainan produsentti Morten Lindberg oli ehđola Grammyn saajaksi, sillä hän oli ollu myötä kahđen albumin tevossa. Niitä ei kuitenkhaan palkittu.
Kotimaa
Kolme ihmistä oon löyđetty kuolheena asumahuonheesta Singsakerissa Tronjamissa. Poliisi eppäilee, ette yksi hengistä olis ensin tappanu kaksi muuta henkkee, jonka jälkhiin hän olis tappanu ittensä.
Pressekonferensissa perjantaina poliisi ei saattanu vielä sannoot mithään tevon motiivista, mutta muisteli ette henget oli saman familiän jäsenii.
Pohjais-Norjassa oon tällä viikola ollu kova myrsky, joka oon kestäny usheeman päivän. Tiistaina Meteorologinen institutti antoi kans ulos kaksi oranssii vaaravaroitusta kovan tuulen takia.
If Tromssan johtaaja Ann Tove Heitmann muisteli NRK:le tuorestaina, ette siihen saakka het olhaan saanheet noin sata ilmotusta tuulen takia tulheesta vahingosta.
Maanantaina staatinministeri Jonas Gahr Støre ja finanssiministeri Trygve Slagsvold Vedum ehđotti, ette Norja tullee antamhaan seittemenkymmentäviisi (75) miljarttii kruunuu apurahhaa Ukrainale seuraavat viisi vuotta. Se meinais, ette maa sais joka vuosi viisitoista (15) miljarttii kruunuu Norjalta.
Støren jälkhiin viisikymmentä (50) prosenttii summasta menis militääripuolustuksheen ja loput ihmisten auttamisheen. Hän kans vahvisti, ette osa rahoista hajethaan Norjan öljyrahoista.
Nyt hallitus tullee praattaamhaan kaikkiin Isotingan parttiin kans, ja toivoo ette het tultais yhtheysymmäryksheen 24. fepruaarikuuta menneessä.
Johnny Vassbakk tuomithiin maanantaina Birgitte Tengsin taposta, joka tapattui vuona 1995. Vassbakk tullee istumhaan fankilassa seittementoista (17) vuotta, ja häyttyy lisäksi maksaat vanhemiile satakaksikymmentätuhatta (120 000) kruunuu.
52 (viiđenkymmenen kahđen) vuođen ikhäinen Vassbakk oon sanonu olleevansa sytön, mutta oikkeus kattoo, ette Tengsin housuista löyđetty DNA tođistaa, ette Vassbakk tođela oon tevon takana. Hiljemin Vassbakk oon valittannu tuomiosta.
Maanantaina Pohjaismaissa feirathiin saamelaisten kansanpäivää. Päivää markeerathaan joka vuosi 6. fepruaarikuuta, koska silloin piđethiin ensimäinen saamelaisten suurmöötti Tronjamissa vuona 1917 (tuhatyhđeksensattaaseittementoista).
Lauvantaina Norja valitti sen Euroviisu-ehđokkhaan MGP-kilppailussa Tronjamissa. Ehđokas oon 20 (kahđenkymmenen) vuođen ikhäinen Alessandra laulula Queen of Kings, Kuninkhaitten kuningatar.
Euroviisut piđethään tänä vuona Englanissa 9. ja 13. maikuuta.
Hei!
Met NRK Kväänilä kojema, ette se oon tärkkeetä kirjoittaat artikkeliita kans kvääniksi. Siksi kans tämä artikkeli oon kväänin kielelä. Halluutko sie kyssyyt jotaki meiđän sanavalinoista tahi olisiko sinula ollu parempi alternatiivi? Lähätä meile e-postii niin kehitämä yhđessä NRK Kväänii paremaksi!