Viikkouutiset kvääniksi

Isotinkavaalit piđethään maanantaina, ja koskhaan ei ole niin moni äänestäny ennakhoon ko nyt. Lisäksi Norja tullee saamhaan kymmenen uutta kansalistarasta ja mailmalla Afganistanissa Taliban oon vieny pois vaimojen oikkeuksii.

Stortinget

Isotinkavaalit oon ensi viikola maanantaina.

Foto: Tore Ellingseter / NRK

Kotimaa

Tuorestaina 1.331.606 oli äänestäny ennakhoon isotinkavaaleissa. Se oon enämen ko koskhaan ennen, ja 34,3 prosentii kaikista joila oon äänioikkeus.

Isotinkavaalit piđethään 13. septemperikuuta, ja sie saatat äänestäät ennakhoon 10. septemperikuuta asti, joka oon tääpänä.

TI1s57yovwI

Koskhaan ennen niin moni ei ole äänestäny ennakhoon isotinkavaaleissa ko nyt.

Foto: Håkon Mosvold Larsen / NTB

Isotinkavaalit oon maanantaina ja Norjan politikissa kuohuu. Tällä viikola myrskyn silmässä oon ollu politikkarit, jokka oon asunu ilman kullui Isotingan järjestämässä asumahuonheessa vaikka heilä oon ollu kans oma asumahuone Uslussa.

Reekelinnä oon, ette vain isotinkarepresentantit, jokka assuu kaukana Uslusta, saađhaan asumahuonheen jotta hte ei häyđy ostaat eli laikottaat kahta huonetta, ette het saatethaan tehđä töitä Isotingale.

Lapsi-ja peretministeri Kjell Ingolf Ropstad (KrF) oli registeeranu ette hän assuu viralisesti Agderissa hänen vanhiimiitten tykönä, ja sai siksi Isotingalta asumahuonheen Uslussa. Hänelä oli kuitenki kans oma asumahuone Lillestørmissä, jota hän laikotti muile. Hän sai tästä voittoo.

AP-politikkari Tellef Inge Mørdlan oli taas registreeranu ittensä Arendalhiin, vaikka hänelä oli asumahuone Uslussa. Kans hän laikotti sitä muile ja sai tästä voittoo.

Molemat pahoitelhaan tekemisthään.

Vuoden 2021 kouluvaalit pidethiin tiistaina. Frp oon vuođen yllättääjä nousemalla 3,5 prosentista 13,9 prosenthiin ja saamala toiseksi eniten äänii kaikista parttiista. Punavihrisillä oon kuitenki edelheen enämistö kouluvaalin tuloksissa.

AP oon isoin parttii, vaikka SV nousi eniten vaseman puolen parttiista.

Maja Enlig legger stemmeseddelen i urnen på Gauldal Videregående skole under skolevalget i 2021.

Maja Enlig äänesti kouluvaaleissa Gauldalin jatkokoulussa.

Foto: Jøte Toftaker / NRK

Norja ei ole ennää niin nuuka tartuntalukkuin kans ko ennen. Näin ilmoitti tervheysministeri Bent Høye (H) tuorestaina hallituksen pressekonferanssissa.

– Nyt met seuraama enämen kunka moni koronapasientti oon sikhuusissa ja kunka moni oon ottanu vaksiinin.

Niin meinaa kans FHI-tirehtööri. Hän meinaa, ette nykynen tartuntaluku häytyy ottaat vakavasti, mutta ei liian. Norjassa heti 90 prosenttii raavhaista oon saanu molemat vaksiinit, ja tääpänä 18 808 lasta (12-15-ikhäiset) oon saanu ensimäisen piston.

Ihmiset eppäilee ottaat Moderna-vaksiinin ainakin Bergenissä, Alattiossa ja Tromsassa. Syynä oon, ette ihmiset oon saanu ensin Pfizer-vaksiinin, ja peläthään nyt ottaat eri vaksiinin toiseksi pistoksi.

Bergenin tartuntaylilääkäri Kjell Haug sannoo Bergens Tidendele, ette pelon syynä oon Modernan kovemat sivuvaikutukset.

FHI pyyttää Norjaa olemhaan valmis kovvaan infulenssakautheen. Tämä siksi ette viimi vuona maassa registreerathiin tyhä 11 infulenssatappausta, ja sen takia meilä oon ny lievämpi immuniteetti virusta vasthaan.

FHI varoittaa ette sikhuusit saatethaan jouttuut kovile, jos net häydythään hoittaat monta infulensapasienttia koronapasienttien lisäksi.

Norja oon tillaanu 1,8 miljuunaa infulenssavaksiinii.

Tiistaina hallitus esitti Norjan kymmenen uutta mahđolista kansalistarasta, ja oon pyyttäny Miljöödirektoraattia alkkaat työtelheen assiin etheen. Ennen maassa oon ollu 47 kansalistarasta.

Nelje näistä uusista kansalistaroista löyđythään Vestlannin fylkkistä:

  • Hornelen (Bremanger)
  • Masfjordfjella (Masfjorden ja Alver),
  • Øystesefjella (Kvam, Samnanger ja Vaksdal)
  • Sunnmørsalpene (Ørsta)

Lisäksi nämät kuusi suojelualaa saatethaan heti olla kansalistaroita: Yykëanvaarat, Sylan, Trollheimen, Oksøy-Ryvingen, Flekkefjord- ja Listastrendene ja Ålfotbreen.

Skiløpere i Lyngsalpene

Yykëanvaarat tullee olemhaan yksi Norjan uusi kansalistaras.

Mailma

Amazon-rekiuunissa oon menetetty 10 476 kvadraattikilomeetterii mettää viimi vuođen aukustikuun ja tämän vuođen juulikuun välilä, sannoo miljööjärjestö WWF.

– Jos met menetämmä Amazonit, met menetämmä samalla yhđen meiđän suurimista hiilidioksidilaakeriista, sannoo Dirk Embert, Etelä-Amerikka-ekspertti WWF Tyskältä.

Afganistanissa Taliban oon perustanu väliaikaisen hallituksen. Mulla Mohammad Hassan Akhund, joka oli perustamassa Talibania, oon ny maan johtaaja. Abdul Ghani Baradar oon maan varajohtaaja.

Maan sisäministeri Sirajuddin Haqqani oon Haqqani-verkoston johtaaja, ja oon monen terrorihyökkäyksen takana, kuten sen, joka tapahtui Hotel Serenassa 2008 ja tappoi Dagbladet-journalistin Carsten Thommassen.

FBI oon freistanu pyyttäät Haqqinia pitkhään ja hänen päästhään oon luvattu 5 miljuunan dollarii.

Tila Afganistanissa ei ole hyvä. Lauvantaina monet vaimot oon demostroinu Kabulissa Talibania ja heiđän yhtä isointa tukipilaria, Palestiinaa, vasthaan. Vaimojen oikkeuđet oon nyt maassa heikot ja mielenosoituksen tarkoituksenna oli näyttäät, ette afganilaiset vaimot ei hyväksy ennää lissää sortoa.

Taliban hajoitti mielenosoituksen ashein. Kaksi afganilaista journalistia kans hakathiin, koska het kuvathiin mielenosoitusta. Taliban oon nyt sanonu ette ihmiset ei saa demonstroiđa ilman hallituksen lupaa.

Taliban grep lørdag inn i en demonstrasjon for kvinners rettigheter i Kabul.

Taliban hajoitti lauvantain mielenosoituksen ashein ja oon kieltäny ihmissii nyt demostroimasta.

Foto: AA/ABACA / Abaca

WHO (Mailman tervheysjärjestö) tahtoo ette raharikkhaat maat ođotethaan ennen ko het annethaan kolmanen koronavaksiinin heiđän kansalaisile. Covax ilmoitti keskiviikkona, ette tyhä 20 prosenttii ihmisistä köyhissä maissa tulhaan saamhaan koronavaksiinin vuođen 2021 aikana.

WHO:n sekretääri Tedros Adhanom Ghebreyesus tahtoo, ette kaikki maat saisi ensin ensimäisen ja toisen vaksiinin, ennen ko rikkhaat maat aloitethaan kolmannen piston kans.

Kolme neljestä norjalaista oon valmis ođotamhaan kolmatta vaksiinii, näyttää Norsk Folehjelpin tutkimus. Sekterääri Henriette Westhrin jälkhiin se näyttää ette norjalaiset meinathaan, ette kaikki maat häydyhthään olla samat oikkeuđet.

Texasissa tuli viime viikola käythöön uusi, tiukka aborttilaki. Laki kielttää usseimat abortit, sillä nyt aborttia ei saa tehđä ennää kuuđen viikon jälkheen.

Meiđän mailma

Hallitus aikkoo anttaat 521 miljuunaa kruunuu saamilaisen jatko- ja poronhoitokoulun ja kansalisteatterin Det Samiske Nasjonalteateret Beaivvášin rakenthamisheen. Näin ilmoitti puolustusministteri ja Høyre-politikkari Frank Bakke-Jensen ko hän oli Koutokeinossa keskiviikkona.

Kulttuuridepartementti aikkoo tukkeet Kvääniteatteria 875 000 kruunula. Styyrijohtaaja Torbjørn Naimak sannoo ette teatteri aikkoo käyttäät rahan sen ensi vuođen perustuskulhuin. Kvääniteatteri aukkee syksylä 2022.

– Praksiisissa se meinaa, ette yhđessä sen rahan kans mikä meilä jo nyt oon, met saatama nyt perustaat oman teatterin kvääniile, sannoo Naimak.

Dans og spill på Kyläpeli

Kvääniteatterin porukka oon kans Kyläpeli-tapattuman takana, joka piđethään joka vuosi Pohjois-Tromssassa.

Foto: Laila Lanes / NRK

Kunnskapsdepartementti oon lähätäny ehđotuksen uuđesta opetuslajista kuultavaksi. Laki tullee korvaamhaan nykyisen opetuslajin, ja anttaa koululaisile, joilla oon kvääni/norjansuomalainentausta, lakisääteisen oikkeuđen kväänin- eli suomenkielen opetuksheen.

Jos departementtin ehđotus mennee läpi, tullee tämä oikkeus vain koskemhaan koululaisia, jokka asuthaan Tromsshan ja Finnmarkun fylkissä. Tämä, vaikka Koulutusdirektoraatti (Utdanningsdirektoratet) oonki arvioinu ette sillä olis myöntheisimmät vaikutukset, jos oikkeus koskis koko maata.

Ruijan kvääniliiton johtaaja, Kai Petter Johansen, ei ole tytyväinen lakiehđotukseen. Liitto meinaa lähättäät departementile korjausehđotuksen. Se oon mahđolista 20. desemperikuuta asti.

– Kväänit ei oo rekiunaali minoriteetti, sannoo Johansen NRK Kväänile.

Hver fredag publiserer NRK Kvensk de viktigste nyhetene fra siste uke på kvensk. Hva slags nyheter vil du lese på kvensk? Tips oss!