Norja
Deltavariantin ja kasvavan tartuntaluvun takia oon hallitus päättäny lykätä maan jälleenaukaisemista. Päätöksheen vaikutti neuvo jonka Tervheysdirektoraatti ja Kansantervheysinstitutti antoi hallituksele.
Nyt plaanana oon aukaista Norjaa enämpi augustikuussa.
– Mie uskon ette syksylä met saatama aukaista maan kokonhaan, mutta met toivoma ette vähä usseempi olis saanu vaksiinin ennen sitä, sannoi staatinministeri Erna Solberg (H) NRK:le.
Norjassa oon tällä viikola ollu melkkein 2000 deltavariantti-tappausta. Niin sannoo FHI:n viikon 29 raportti.
Melkkein kaikki raavhaat oon nyt saanu Norjassa tarjouksen ensimäiseen koronavaksiiniin. FHI uskoo ette kahđen viikon jälkheen tarjouksen oon saanu kaikki.
Ylilääkäri Preben Aavitsland FHI:lta sanoi NTB:le, ette het uskothaan ette noin 80 prosenttii raavhaista oon saanu molemat vaksiinit noin kuuden tai kahdeksen viikon jälkheen.
Etelä-Norjassa oon ollu alkuviikosta kovvii ukonilmoi ja tämän takia monet menetti sähköt usseeksi tiimaksi. Eteläinen Norja oon saanu nauttiit korkeista lämötiloista usseen viikon aijan.
Sunnuntai yönä moni Etelä-Norjassa näki meteoriitin yötaivhaala missä se räjähti palasiksi. Meteoriitti oli vähän yli kymmenen kiloo painava ja sen palaset levithiin Lier-plaanale, tiettää Vegard Lundby joka oon pois Norjalaisesta meteoriittiverkostosta (Norsk meteornettverk).
Räjähtäny meteoriitti ei tehny tuhoi.
Mailma
Islanti, Italia ja San Marino oon nyt oranssiita maita Norjan hallituksen koronakartala. Tämän lisäksi kans kolme Ruotsin rekiuunii, Hallands, Skåne ja Stockholm, oon muuttunu oranssiiksi.
Tuorestaina 29. juulikuutta ihmiskunta oli käytäny tämän vuođen uusiutuvat luononvarat lopphuun. Tämä oon Global Footprint Network:in arvio. Viimi vuona tämä tapahtui kolme viikkoa hiljemin, augustikuun 22. päivä.
Kovat tulvat ja maanvierimät oon tehny paljon tuhoi ymäri mailmaa. Moni oon kuollu ja yhä enämpi oon häytyny lähteet evakhoon muun muvassa Pohjois-Italiassa, Bangladeshissa ja Afghanistanissa.
Tämän lisäksi myös suuret mettäpalot rähäytethään Venäjällä, Ruotsissa, Franskassa ja Californiassa.
Moni uusi plassi oon saanu mailmanperintöstatuksen Unescolta. Komitea teki päätöksen heiđän vuosimöötissä Kiinan Fuzhoussa. Uusiki perintöplassiiksi tuli muun muvassa 7000 vuotta vanhaat muumiot Chilessä, Tlaxcala-katedraali Meksikossa ja Chanquillo-aurinkoobservatoori Perussa.
Sportti
Kristian Blummenfelt voitti kultaa triathlonissa Japanin olympiakilppailuissa. Se oli ensimäinen kerta yhđekseen vuotheen ko Norja oon voitanu kultaa kesäolympialaisissa.
Meiđän mailma
Ruijan kvääniliitto ei meinaa järjestäät yhtheistyöleirii «Et språk, en kultur, ett folk» Torniojokilaaksolaisten kans tänä vuona. Syynä oon korona. Liitonjohtaaja Kai Petter Johansen sannoi Ruijan Kaijule, ette liitto meinaa yrittäät uudesthaan ensi vuona.