Viikkouutiset kvääniksi

Mies ammuhtiin avaruutheen ja Keski-Kiina oon tulvaveđen vallassa. Norjassa taas muistelthiin heitä jokka menetti hengen 22. juulikuun terrorihyökkyksessä kymmenen vuotta sitte. Luje nämät ja muut tämän viikon uutiset NRK Kväänilä.

Flere møtte opp på Hundvåg i Stavanger for å markere 10-årsdagen for 22. juli-terroren. Det ble lagt ned 77 røde roser ved minnesmerket.

Kymmenen vuotta sitte 77 henkii menetti hengen terrorihyökkåyksessä Uslussa ja Utøyan saarela. Hirveetä päivää ja sen uhrii muistheltiin tapattumissa ympäri maata.

Foto: Odd Rune Kyllingstad

Norja

Viimi janturin aikana Norjassa registreerathiin 266 uutta koronatartuntaa. Se oon 110 enämpi ko viimi viikon perjantaina.

Ikinä ei ole niin moni saanu opintopaikkaa maan universiteetiissa ja korkkeekouluissa ko tänä vuona. 110.119 hakkiijaa oon nyt saanu tarjouksen koulupaikasta – 3.304 enämen ko viimi vuona.

Norja vettää koko EØS-avustuksen (EØS = Euroopan ekonominen yhtheistyöplaana) pois Unkarilta. Tuen määrä olis ollu 2,3 miljartia kruunuu. Tästä tuesta 100 miljuunaa häytyi mennä maan kansalaisyhtheiskunnale, muun muvassa ihmisoikkeuksiitten lujittamisheen, mutta maat ei ole tullu yksimielisiksi kunka juuri 100 miljuunan avustuksenossaa käytetettäis.

– Met olema neuvottelleet tästä monta vuotta, mutta emme ole tulleet yksimielisiksi, sanno ulkoministeri Ine Eriksen Søreide NRK:lle.

Tuorestaina 22. juulikuuta tuli täytheen kymmenen vuotta siitä ko terrorihyökkäys tapahtui Uslussa ja Utøyan saarela. Ympäri Norjaa pidethiin muistotapattumaita missä muistelthiin niitä 77 jokka menetti hengen hyökkäyksessä. Norjan kuninkhaanvaltakuntan kuningas Harald meinaa ette met emme ole tehny tarpheeksi hyökkäyksen jälkheen, koska suru ja viha ellää yhä maassa.

– Met häyđymä tunnustaat ette met yhtheiskuntana emme ole tarpheeksi auttanu, ja kantanu takkaa laakissa – ja taistelu niitä pimmeitä voimii vasthaan, sannoi kuningas muistotapattumassa Uslun Spektrumissa.

Kong Harald holder tale under det nasjonale minnearrangementet i Oslo Spektrum.

Norjan kuninkhaanvaltakuntan kuningas Harald piti saarnan 22. juulin muistotapattumassa Uslun Spektrumissa.

Foto: Fredrik Hagen / NTB

3,3 miljuunaa ihmistä oli saanu ensimäisen vaksiinipiston Norjassa, näytti FHI:n statistikki tuorestaina. 1.706.559 henkii oon saanu kans toisen piston.

Se oon Deltavariantti joka dominoi nyt Norjassa. Niin muistelee FHI sen viikkoraportissa. Viikola 18 koronatartunnoista yhđelä prosentilla oli deltavariantti, mutta viikola 28 luku oli kassu 58 prosentiin.

Uusi tutkimus näyttää kuitenki ette kaksi vaksiinipistoa Pfizer/Biontechta eli AstraZenecaa varjelhaan yhtä hyvin deltavarianttii vasthaan ko alfavarianttii. Tutkimus annethiin ulos New England Journal of Medicine:ssä.

Koronavirus

Deltavariantti dominoi Norjassa, mutta Pfizer/Biontecht eli AstraZeneca vaksiinit varjelhaan hyvin sitä vasthaan. Uslussa kaikki oon saanu tarjouksen vaksiinitiimasta.

Foto: CDC

Mailma

Spania ja Neederlanti oon muutunu tummanpunaisiki ECDS:n kartala. Se meinaa ette ihmiset joilla ei ole vielä vaksiinii, joduthaan karanteenihotelliin jos het tulhaan sieltä Norjaan.

ECDS kart

Spania ja Neederlanti oon nyt tummanpunaisia ECDS-kartala.

Keski-Kiinassa Henan oon rankasatheitten takia veđen vallassa. Ainaki 25 oon kuolu pääkaupungissa Zhengzhoussa tulvan ja maanvierimiitten takia.

Amazon.comin perustaaja ja mailman rikkain ihminen, Jeff Bezos, ammuthiin 106 kilomeetterin korkeutheen hänen omala raketila jotta hän saattais kryssätä atmosfäärin ja avaruuden rajan. Hänen matkassa oli kolme henkii: Oliver Daemen (18), Wally Funk (82) ja oma veli Mark Bezos.

Raketti ”New Shepard” ammuthiin ylös kello 15:12 ja se lantas 15:23.

Toinen miljunääri, Virgin Galacticin perustaaja Richard Branson, teki saman noin viikko sitte, mutta ei päässy nii korkeele.

Jeff Bezos foran raketten New Shepard

Jeff Bezos kryssäs atmosfäärin ja avaruuden rajan hänen omala raketilla New Shepardila.

Foto: Blue Origin

Sportti

Tokion olympialaiset alkkaa tääpänä.

Norjan vaimoin rantakäsipallomaalaaki sai 15 000 kruunun sakon koska sen pellaajilla oli liian peittävät vaatheet Bulgarian EM-kilppailuissa. Heilä oli päälä sortsit koska het haluthiin protestoiđa lajin tiukkoi Euroopan liiton uniformireekeliitä vasthaan. Reekeliissä sanothaan ette vaimoin häydythään pelata bikinit päälä.

Norjan rantakäsipallovaimot oon jo ennen meinanu ette reekelit vaimoile oon liian tiukat. Esimerksiki miehet saađhaan pelata shortsit päälä. Vaimoin toivosta Euroopan liitto muutti reekeliitä keväälä, mutta reekelimuutoksen käyttöönotton aika oli epäselvä ja Norjan maalaakkii vaađithiin pelata yhä bikineissä.

strandhåndball

Näjekö sie eron? Norjan vaimoin rantakäsipallomaalaaki ihmettellee miksi het ei saa käyttäät shortsei.

Foto: Viasport

Meiđän mailma

Tromssan ja Finmarkun staatinhallittija jakkaa avustusta niile hengile ja faakimiljöile jokka halluu kehittäät kväänin ja suomen kielen oppimateriaalii. Materiaalin häytyy olla passeli «Kvääni eli suomi toisenakielenä» oppiplaanhaan.

Fristi anomukselle oon 6. septemperikuuta 2021.

Pyssyjoven jahti- ja kalastuseuran vuosimöötti oon päättäny ette Pyssyjoven varrela käytehtään tyhä kylttii kväänin kielelä. Se oon Porsangin ja Kaarasjoven saameseurat jokka oon tahtonu ette joven varrele saatas kans saamen kieliset kyltit. Tähän vuosimöötti sanoi selvän ei.

Skilt i Børselv

Pyssyjoven joen varrella oon kans tulevaisuuđessa kyltit tyhä kväänin kielelä.

Foto: Anne Mari Rahkonen Berg / NRK

Hver fredag publiserer NRK Kvensk de viktigste nyhetene fra siste uke på kvensk. Hva slags nyheter vil du lese på kvensk? Tips oss!