Kotimaa
Norjassa oon sattunu tällä viikola monta vakavaa trafikkionnettomuutta. Keskiviikkona kaksi ihmistä kuoli Trøndelagissa ja Seljordissa, ja eilen tuorestaina nuori mies kuoli Tenossa Finmarkussa.
Kongsberg-tappauksen oikeuđenkäynti oon jatkunu tällä viikola. Keskiviikkona viiđen ihmisen pyyvilä ja puukola tappanu Espen Andersen Bråthen (38) antoi oman selityksen tevole, ja pyysi lisäksi antheeksi hänen uhriilta.
– Mie halluun pyyttäät antheeksi kaikilta heiltä, joita mie ammuin pyyvilä ja heitin puukola.
Syyksi Bråthen antoi hänen pelon oman näkökyvyn menettämisestä. Hän oli nimittäin pitkhään pöläny, ette hän tulis heti menettämhään nävönsä. Hän uskoi, ette jos hän halluu uuđelesynttyyt pareman nävön kans, häytyi hänen tappaa niin monta ihmistä ko mahđolista. Oikkeuspsykiatri oon tođenu, ette Bråthen oon mieleltä sairas.
Tappaus oon nostanu esile suuren debatin niin Norjan poliisin toimintakyvystä, ette psykiatrihoiđosta. Moni ei ymmärä, kunka poliisilla saattoi mennä 37 minuttii Bråthenin kiini ottamisheen. Toiset taas hunteeraa, miksi niin sairas ihminen ko Bråthen, joka oon kans ennen tuomittu väkivallan takia, oli eđes vaphaala jalala.
FHI ilmoittaa, ette yli 65-vuođen ikhäiset ihmiset saatethaan syksylä saađa tarjouksen neljentheen koronavaksiiniin. Tääpänä tyhä jokku yli 80-vuođen ikhäiset ja heikon immuunipuolustuksen omaavat oon saattanu saađa ylimääräisen, neljenen piston.
FHI ei kuitenkhaan tođennäköisästi suosittele vaksiinii tervheile, alle 45-vuođen ikhäisille ihmisille.
Passijonot oon ollu pitkät ympäri Norjaa. Koronapandemian aikana 450.000 norjalaista passii meni vanhaaksi, ja nyt pandemien jälkhiin moni halluu uussii
Isotinka vaattii noppeeta ratkaisuu passikriisile, ja parttii Venstre ehđottaaki ette poliisistašuuniitten häyđythään olla pitemphään auki, ja ette net häyđythään saađa lissää työntekkiijöitä. Näin norjalaiset päästhään lomale, jokka het korona jälkhiin oon ansainu.
Hallitusparttiit Ap ja Sp ei kuitenkhaan tue Venstren ehđotusta. Koska suurin osa Isotingassa oon kuitenki ehđotuksen puolela, tullee Ap ja Sp olemhaan vähemistö, ko assiista äänestethään Isotingassa 2. juunikuuta.
Mailma
Tiistai iltapäivänä 19 kläppii ja kaksi raavasta kuoli Uvaldessa Texasissa, ko 18-vuođen ikhäinen Salvador Ramos hyökkäs asheen kans paikalisheen lastenkoulhuun. Myötä hänelä oli aset, jolla hän oli kans aijemin tappanu oman isoäiđin.
Paikalinen poliisi ilmoittaa, ette Ramos kuoli poliisin luođhiin. Tieđossa kans oon, ette hän oli ilmoittannu plaanasta 30 ja 15 minuttii ennen hyökkäystä Facebookissa.
Kouluampuminen oon USA:n pahhiin sitte Connecticutin kouluampumisen vuona 2012. Poliisi ei vielä tieđä tevon motiivii.
Apinarupi, joka luo ihole haavoi ja paisheita, levvii nyt kovvaa tahtii Euroopassa. Eriliikaisesti se oon leviny miljöössä, missä miehet oon seksuaalisessa kontaktissa toisten miesten kans. FHI:n osastojohtaaja Frode Forland kuitenki muistuttaa, ette seksuaalisela suuntautumisela ei ole viruksen kans mithään tekemistä, vaan virus levvii ihokosketuksessa.
– Likikontakti oon poengi tässä assiissa. Se saattaa liikka hyvin tarttuut vaimolta miehele, ko mieheltä miehele. Se tarttuu ihokosketuksen kautta, eli seksin, syljen eli kroppimärkkiin kautta, sannoo Forland VG:le.
Apinarupi ei ole kuitenkhaan ole niin kova levviin, ko esimerkiksi koronavirus, ja siksi FHI ei usko ette se olis pelkkoo uuđele pandemialle. Norjassa ei kans ole vielä tieđossa yhthään apinarupitappausta.
Vaikka pandemialle ei luultavasti ole vaaraa, oon Norja yhđessä EU:n kanssa päättäny ostaat sitä laakerhiin. Normaali rupivaksiinin antaminen lopetethiin nimittäin vuona 1976.
Venäläinen diplomaatti Boris Bondarev jätti maanantaina oman virkansa FN:stä. Sen hän teki protestiksi Venäjän päätösvalttaa ja Ukrainan sottaa vasthaan.
– Koskhaan mie en ole häveny niin paljon minun ommaa maata ko 24. fepruaarikuuta jälkhiin, kirjoittaa Bondarev eropreevissä.
Se oon 24. fepruaarikuuta ko Venäjä aloitti hyökkäyksen Ukrainassa. Bondarevin jälkhiin sota ei tyhä ole Ukrainan kansalaissii vasthaan, mutta kans Venäjän kansalaissii vasthaan.
– Sota jonka Putin aloitti Ukrainaa, ja oikkeesthaan koko vestaista mailmaa vasthaan, ei ole tyhä rikkomus Ukrainan kansalaissii vasthaan, mutta piian issoin ja vakavin rikkomus ikinä Venäjän kansalaissii vasthaan.
Afganistanissa vaimot, jokka työtelhään TV:ssä, häyđythään taas peittäät kasvonsa. Se oon Taliban-järjestön uusi vaatimus, joka tuli voimhaan sunnuntaina.
TV:ssä työtä tekkeevät vaimot meinaa, ette vaatimus oon Talibanin keino saađa vaimot pois TV:stä.
– Kunka mie saatan lukkeet uutissii, jos minun suu oon peitetty? Mie en tieđä mitä mie saatan tehđä. Mie häyđyn työtelä ja pittää huolta minun familiästä, sannoo anonyymi journalisti BBC:le.
Monet miehet, jokka työtelhään programijohtaajiinna afganilaisessa TV:ssä, oon viikon aikana kans peittäny suunsa protestiksi Talibania vasthaan.
Turkkia tuli tiistaina ulos viralisen vaatimuslistan kans, missä seisothaan net assiit jokka Suomi ja Ruotti häyđythään tehđä, jos het haluthaan tulla militääriliitto Naton jäseniksi. Vaatimukset oon ollu tieđossa jo aijemin, mutta nyt ne oon ensimäistä kerttaa viralissii.