Kotimaa
Koronan tila Norjassa oon muuttumassa pahemaksi. Eilen maassa oli 1534 uutta tartuntatappausta, joka oli 538 enämpi ko samana päivänä viimi viikola. Eilen kans 171 henkkee oli pantu sikhuushiin viruksen takia.
Tila oon paha varsinki Tromssassa ja Tronjamissa missä tartuntoi oon enämpi ko koskhaan aijemin. Pohjois-Norjan universi-teetti-sik-huussi häyttyy esimerkiksi siirttäät muita operasjuuniita koronapasientiitten takia.
Tervehysministeri Ingvild Kjerkol piti eilen kriisimöötin komuuniitten kans koronatilasta, mutta ei vielä näje tarvetta kansalisile rajoituksile.
Norjassa oon tääpänä ennätysmäärä ikäpensio-nis-tiita. NAV:in jälkhiin miljuuna ihmistä nostethiin maanantaina pensi-onii, joka oon enämpi ko koskhaan aijemin.
Ikäpensionistiiten määrä oon noussu nelkekymmentä prosenttii kymmenessä vuođessa, joka meinaa noin kolmea sattaa tuhatta ihmistä. Tääpänä siis joka seittemes norjalainen oon ikäpensionisti.
– Luku näyttää, ette suuri osa meiđän kansalaisista oon ikäpensio-nis-tiita. Se oon kans interesanttii nähđä, ette suuri osa heistä oon yhä työelämässä, sannoo NAV-tirehtööri Hans Christian Holte.
Holte uskoo, ette suuren luvun takia Norjassa tullee heti olemhaan debaatti pensonisti-ijän ympäri. Tääpänä 62 vuođen ikhäinen henki saattaa nosttaat pensionistii ja tehđä samala töitä.
Mailma
Glasgowiassa oon juuri nyt menossa YK:n kliimahuippukokkous. Yli 120 staatinjohtaajaa ympäri mailmaa oon kokkoontunu Skotlannin suurimphaan kaupunkhiin praattaamhaan kliimakriisin ympäri ja siitä, kunka het yhđessä saatethaan sen pyssäyttäät.
Tunnettu kliimanpuolustaja, Sir Davin Attenborough piti saarnan möötin viralisissa avajaisisa.
– Olen elämäni aikana tođistanu kauheen alasmenon. Teđän elämänne aikana tet saatatta ja tet häyđyttä nähđä fantastisen parantumisen. Tämä epätoivoinen toivo, hyvät vaimot ja herrat, eđustaajat, suurlähettiläät, oon syy miksi mailma nyt kattoo teitä ja miksi tet oletta tällä.
Jos kaikki maat piđethään luppauksensa, jokka het oon antanu kiilmamöötissä tähän saakka, saatethaan globaali kliimanlämpiäminen pyssäyttäät 1,8 graađiin, meinaa Det internasjonale eneribyrået.
Eilen tuorestaina Ruotsi sai uuđen staatinministerin. Magdalena Andersson, joka kans nyt oon maan sosiaaliđemokraattien uusi johtaaja, oon Ruotsin ensimäinen naisstaatinministeri.
Andersson oon ollu vuođesta 2014 saakka finanssiministeri Stefan Löfven hallituksessa, jonka tilale hän nyt tuli.
Anderssonia kuvvailhaan sukkelaksi, tarkaksi, kärsimätömäksi ja ittepäiseksi, ja joka ei pölkkää sannoot ommaa mielipiđettä.
Meiđän mailma
Tämän viikon keskiviikkona järjesti Tromssan ja Finnmarkun fylkki Kvääniseminaarin Tromssassa. Seminaarin teemana oli varsinkin nuoret kväänit ja ne positiiviset assiit, jokka nyt tapahtuu kväänimiljöössä.
Seminaarin isoin ja hienoin hetki oliko 90 vuođen ikhäinen kvääniveteraani Reidun Mellem sai Kuninkhaan metaljin hänen työsthään kväänin kultuurile ja miljööle.
Pyhänä Uslussa se oon kans mahđolista päästä oppimhaan lissää kväänikansan histooriasta. Paikalinen kvääniseura Etelä-Norjan kvääniseura järjestää nimittäin kokkouksen ”Norges nasjonale minoriteter, med flere hundre års tilknytting til Norge – og deres skjebne i Norge”, jonka teemana oon kansaliset minoriteetit ja kunka staatti oon kohdelu heitä. Debattii johtaa historiikkeri Trond Gabrielsen.